Fiamthu leh kan nunkhua

Mihring hian a rilru-a thu awm a sawichhuak thin a, a thinlung luahtu thil a puang thin. A puan dan hrang hrang a awm; tingtang hmanga puang thin an awm a, thuziak hmanga puang thin an awm. Hla hmanga puang thin an awm a, a then chuan lemziak hmangin an puang thin. Milim ker hmangtein a then chuan an puang a, thawnthu hmanga puang thin te pawh an awm. Chutianga mahni rilru leh thinlung chhunga mi, midangte hriat theih tura puang thiamte chu 'artist' an ti a, khawvel hian a ngaisang hle.

Chutianga mihring rilru puanchhuahna lar tak, mipui mi mir lawm em em thil pakhat a awm; fiamthu hi.

Fiamthu chu 'art' a ni a, fiamthu thiamte chu 'artist' an ni. Hnam tinin kan lawm a, kan lawm mai a ni lo, kan mamawh a ni.

Fiamthu chu mihring atanga chhuak a ni a, mi fing leh fing lo en nan pawh a fiamthu a fin leh fin loh chu tehkhawng hman tlak pakhat a ni a, chutiang bawkin hnamin hma a sawn leh sawn loh te, an rilru zau leh zau loh te pawh fiamthu atang hian thui tak a hriat theih a ni.

'Hmasawnna' han tih hian Mizote rilru-ah chuan a hmuh-a hmuh theih, thlawhna tumhmun te, rel kawng te, stadium te, hotel tha te leh thil dang dang a lang thin. A hmuha hmuh theih loh lama hmasawnna lam hi kan ngaihthah tlat a, kan politics-ah pawh chu tho chu a ni. Hnam politics te, rilru leh thinlung lama hmasawnna te aiin 'infrastructure' lam kan ngai pawimawh a, Millenium Centre changkang takah bazar thin mah ila Tuikuk pawh hneh thei lo khawpa chak lo kan ni reng a ni!

Car man to ber berah kan chuang a, bungraw man to pui pui kan nei sup sup a, computer leh motor lamah chuan a zuarte pawhin hralh that lawmman an dawng fo. Hmasawn chak kan inti a, Pathian malsawmna liau liau ni te pawhin kan hria. Mahse, kan rilru lam erawh a la hniam hle a, art lama kan hniamzia te phei chu phuahchawp emaw tih tur khawp a ni. Kan sorkar pawhin a ngai pawimawh lo.

Kan fiamthu ngei pawh enkawl lovin kan kaltir emaw tih tur khawp a ni; a thahnemngai zual mi thenkhatin an kalpui naw naw a, sorkarin ngaisang hek suh, society-in ngaisang hek suh, kan fiamthu pawh a thang hlei thei lo reng a ni. Mahse, mi hnam ang bawkin fiamthu tel lovin kan awm thei si lo!

Kan hnamin hma kan sawn leh sawn loh chu art leh culture lama kan dinhmunah hian a lang thui khawp ang a, art-ah pawh kan fiamthu-ah hian a lang thui viau ang. Kan fiamthu chuan hma a lo sawn lo a nih pawhin fiamthu tel lovin kan awm thei dawn si lo a, fiamthu hniam tak kan nuihpui fo dawn tihna a ni mai!