Maradona World Cup Zin Kawng Chhuk Cho

¢ Hmingsanga

Kar hmasa khan Argentina coach Diego Maradona chu coach a nihna atanga ban mai theih dinhmunah dingin, a enkawl Argentina chu kum 40 hnu-ah a vawi khatna atan World Cup an khel thei lo mai thei tiin kan ziak kha a ni a. Mahse beiseina tlem te an neih chu huaisen taka hmachhawnin an khingpui Uruguay khelmual Montevideo-a Centenario Stadium-ah Maradona leh a pawlte chu hnehna changin kum thara khelh tur World Cup 2010-ah an inhlang kai thei ta e. Maradona pawl te leh Uruguay inkel hian ngaihven a hlawh viau, Argentina coach hi Maradona a ni miau a, ngaihven loh chi ni hek lo.

He inkhelh tan hma hian Maradona dinhmun hi a tha lo hle. Argentina mipuite'n amaha beiseina sang tak an neih pawh a hniam hman hle. National boss a nihna atanga bang mai tura nawrtu pawh a nei hman nghe nghe. Chutih rual chuan amah ngaihsang ngawih ngawihtu, Maradona-in chanchin tha lo a neih chang pawha a thatna lai sawi fan fantute meuh pawhin tun tumah chuan sawi tur an van deuh raih niin reporter thenkhat chuan an ziak hman. Argentina media te phei chuan an chhuah chhe hle. National team meuh kaihruai tur chuan coaching experiance a nei tha lo tiin sawisel a hlawh mawlh mawlh mai. A hmingthatna zawng zawng te, Argetina tana a lo thawhchhuah ve tawh zawng zawng te 'theihnghilh'-in, a bawnghnute in thu sawi duh loin a zu in chu vung takin an sawi hman a ni. Hmana amah chawimawitu leh amah ngaisangtu tam tak khan ' kheng bet rawh' tiin awrual chuah meuhin an an khum ta kha a ni a.

Mahse maksak leh dangdai tak Maradona chuan an hekna zozai chu hre reng mah se coach a nihna chu bansan a tum mai bik lo. Uruguay nen chuan an inkhel ta ngei a, Argentina chu away team zawk mah ni se huaisen takin a nawr ngam. A mual neitu lam lahin inveng bik hek suh, an innawr tawn sak sak a ni ber. First half a zo a, eng thil danglam mah a thleng lo.

Second half pawh a zo tep. Minute 83-naah Uruguay defender Martin Caceres chu yellow card pahnih a hmuh avangin hnawhchhuah a ni. Hemi hnu lawk hian Maradona chuan substitute player Mario Bolatti a luhtir a, chu pa chuan 84min-ah goal awmchhun a khung a, Argentina chu mitthi tho leh ang maiin lawmin an zuang tawr tawr t a ni.

Uruguay chuan an si phurh chu an sut zo thei lo a, hun a tawp zui. Argentina chuan chu goal khat chu 'ticket'-a hmangin South Africa-ah an zin theih phah dawn ta a ni.

Inkhelh zawhah Maradona chu thuthar lakhawm tu te nen an inkawm a, Argentine mipui te chhungah lawmthu a'n sawi hmasa te te a, player te pawh a fak hle. Hemi hnu hian pa mak dangdai Maradona chuan a zepui chhuahin amah sawiseltu media mi leh sate chu he hnehnaah hian an tel ve lo, tiin a sawi ta mai.

"Ka chanchin a chhe thei ang berin an chhuah a, hnawmhne leh bawlhhlawh ang maiin min en a. Carlos Bilardo leh mi dangte nen kan inkarah hem thlak phet an tum a ni," a ti piap piap mai.

Thuthar lakhawmtute a hmachhawn hnu lawk hian team bus-a a chuan laiin thuthar thehdarhtute chu mipat hmeichhiatna lam rawngkaiin zaizirin a chhaih zui leh nia sawi a ni. Argentina coach Diego Maradona hian he thubuai hi a paltlang zo lo a nih chuan match nga hrem a nih bakah pawisa fai 20,000 Swiss francs [€13,000] chawi turin a chungthu hi rel ni thei bawk.

World Cup khel thei tura an inhlankai hnu lawk hian Maradona chuan World Cup khelh a nih hunah heng player-te hi a hruai ngei dawn tih a sawi chiang tawh a, heng Javier Mascherano, Jonas Gutierrez, Martin Palermo leh Mario Bolatti te hi an ni.Argentina aiawha khel turin player 19 hmun ruak la awmah hian tute nge a koh ang le?

TUNGE MARADONA?
Maradona tia kan hriat lar hi a hming pum chu Diego Armando Maradona a ni. October ni 30, 1960 khan Villa Fiorito, Argentina-ah a lo piang a. A taksa pianphung chu tawi viau mah se football khawvelah chuan pa 'sang' a ni.

Maradona tiin koh ni mah se a hming lemah El Diez (The 10) El Pibe de Oro (The Golden Boy), Barrilete Cósmico (Cosmic Kite) ti tein koh fiam a ni thin.

Heng - Argentinos Juniors, Boca Juniors, FC Barcelona, Napoli, Sevilla, Newell's Old Boys, Boca Juniors club-ah te hian a khelh tawh. A vanglai khan ram tan vawi 91 khelin goal 34 a thun a. FIFA World Cup 1982, 1986, 1990, 1994-ah te khelin World Cup vawi li khel mi tlem te zingah a tel. 86 World Cup-ah phei chuan an ram Argentina chu champion a nih pui a nih kha.

World Youth Cup atanga bul rawn tanin kum 1979 khan a vawi khatna atan Argentina hmingin a fehchhuak a, hetih lai hian kum 16 mi chauh a la ni. Kum 1981 khan kum 18 mi niin World Youth Championship-ah Argentina hmingin a khel leh a, hemi tum phei hi chuan Argentina hi champion a nih pui bakah Best Player atan thlan a ni ta hial.

Kum 1982 World Cup kha Maradona in World Cup a khelh hmasak ber a ni. Match nga khelin Brazil nen an inkhelh tumin inkhelh tan atanga minute 5 lekah hnawhchhuah a ni. 86 World Cup-ah hian Best Player niin Golden Ball Award dawngin England nen quater final- a an inkhelh tuma goal hnih a thun zinga goal khat zawk phei chu goal sawisel hlawh tak niin 'Hand of god' an tihsak hial kha a ni. Goal khat dang a thun pawh kum 2002 khan FIFA-in "Goal of the Century' ah a puang hial. He goal a thun dawn hian England player panga Glenn Hoddle, Peter Reid, Kenny Sansom, Terry Butcher, leh Terry Fenwick te a bum vek hnuah a tawpah goalkeeper Peter Shilton a bum leh a, chumi hnu-ah a pet goal kha a ni a, pui tak a ni.

86 World Cup-ah hian Match 5-ah goal 5 thunin a thiante pet goal turin vawi nga a siam sak bawk. Argentina chu World Cup-ah champion a nih pui. 90 World Cup-ah chuan final lut lehin Germany an hmachhawn a, mahse a vanduai zawkah atangin Germany chu an hneh ta lo a nih kha.

90 World Cup khelh a nih hma hian Maradona hian a keartui a tihhliam deuh avangin World Cup hmasa ang em emin a che tha lo. 94 World Cup-ah an ram aiawhin a rawn tel leh a. Maradona hian match hnih chiah khelin goal khat la thun. 94 World Cup-ah hian khawvel hriatah damdawi hman phal loh a hman avangin a mualpho a, football-a mi ropui chu damdawi hman phal loh a hman avangin FIFA chuan khelh chhunzawm a phal sak ta lo a ni.

Maradona hi tawi mah se a a chak a, a bawp te tawi te chu a hmang tangkai thiamin, vawi leh khata han tlan thut ralah phei chuan tlan chak tak a ni. Mual chhunga a chakzia, a thiamzia vawi tam tak khawvel hmu-ah a pholang tawh thin a. Field vei lam sir atanga chak taka goal lam hawi zawnga ball a'n tlan luh pui thin te phei chu a thiam bik em em a ni. Free kick pet hlei hlei kha a thiam zual zaw ber emaw tih mai tur a ni bawk.

82 World Cup zawh khan Maradona chu FC Barcelona te'n a hun laia world record fee ni turin dollar 5.0m-in an lei a. Kum 1984-ah Serie A club Napoli chuan a hun laia world record fee bawkin dollar 6.9m-in FC Barcelona atangin an lei chhuak leh.

Napoli hian Maradona zarah an club-in an chan ngai reng reng loh lawmman chi hrang hrang an dawng thin. Maradoan vang bawk hian club ropui techiam loh chu ropui takah chawisan an ni. Maradona chu Naples khaw mipuite chuan pathian biakin an be lo chauh a ni ber.

Hemi hnu hian Sevilla FC Newell's Old Boys leh Boca Juniors-ah te a'n khel ve leh zawk bawk. Football khelh a chawlhsan hnuah football club enkawl hna thawh a tum a. Kum 1994 khan Argentinian club Mandiyú of Corrientes a enkawl a, a hlawhtlin pui lem lo. A hna a bansan a. Kum 1995-ah Racing Club a enkawl leh a, a hlawhchham pui leh.

Kum 37 a tlin kum October ni 30, 1997 khan football khawvel chu a thlah liam zui ta a ni. Kum 2000 khan Maradona chuan ama chanchin ziahna lehkhabu "I am The Diego" tih chu a tichhuak a, he lehkhabu hi Argentina-ah chuan lehkhabu hrah kal ber pawl a ni. Hemi kum vek hian a lo khelh tawhna Napoli club chuan Maradona chawimawina atan a jersey number hak thin jersey No 10 chu midang hak ve a rem tawh lo tiin an dahtha a.

Kum 2001-ah Argentine Football Association (AFA) chuan FIFA hnenah jersey number 10 chu Maradona chawimawina atan hian khawi ramah mah hak phal tawh loh ni se tiin an ngen a. Mahse AFA te ngenna hi FIFA chuan a pawmsak ta lo a ni.

Kum 2003 khan Argentinos Juniors club te chuan an team stadium chu Maradona hming chawimawina atan stadium hmingah Maradona tiin an vuah a. August ni 15, 2005 khan Argentine television-ah talk show pakhat "The Night of the No. 10" tih a buatsaih a. A zan hmasa berah Pele a kawm a, Argentina-ah chuan hemi zan hian TV thlirtu an tam hle. Pele bakah hian Zidane, Ronaldo, Hernán Crespo te leh Fidel Castro leh Mike Tyson te pawh kawmin thlirtu an tam thei hle.

Maradona hi kum 1990 vel atang khan cocaine ngawl a vei tan a. Hei hian Football a khelhna kawngah pawh nasa takin a pawt hniam a ni. Switzerland leh Cuba ah De - Addiction Center-ah te a awm a. Kum 2002 atanga 2005 chhung khan a hun tam zawk chu Cuba-a De - Addiction centre-ah a hmang tam zawk hial awm e.

Kum 2004 April ni 18 khan cocaine overdose avangin a lungphu a dik lo a, thih ngamin a na a, Buenos Aires hospital intensive care-ah dah a ni. A hnu rei vak lovaa a rawn damchhuak ve leh a. Kum 2003 khan a kum 43-na pianchamah amah ngaisangtute chuan Maradona Kohhran an din ta hial. Hemi kum hi he kohhran hian 43 D.D tia a ziakin "Después de Diego" or After Diego an ti deuh kher a, Maradona kohhran din a nih tan ni hian member pawh min 200 chuang an awm nghal a. Website atangin member sang chuang fe he kohhranah hian an inziak lut nghal bawk.