¢ Hmingsanga
SSA tih hi chu kan hre lar viau tawh awm e. India ramin zalenna a neih tirh lai khan zirnaah he ram hi a hniam em em a nih kha. Khawvel ram changkang zawkte rang taka umphak tumin India sorkar thar chuan ruahmanna hrang hrang a siam a, India danpuiah pawh zirna hian hmun pawimawh ber a luah reng a ni. Tunhnaiah India ram pum huapin zirna bul (Elementary Education) atan Project lian tham tak duan chhuah a ni a, chu chu Sarva Shiksha Abhiyan Mission tih a ni a, Mi tin tana Zirna leh hmasawnna tih thupuiah a hmang a ni. A tum ber chu kum 2010-ah chuan Universal Elementary Education ram puma hlenchhuah a ni.
Innovative Education
SSA hmalakna hnuaiah hian intervention hrang hrang a awm a, chu'ng zinga pakhat chu Innovative Education hi a ni. Innovative Education hnuaiah hian ECCE, Girls Education leh Education for SC/ST a awm a, tuna Sports Academy hrang hrang a neih te hi Education for SC/ST hnuaia din a ni. Tunhma chuan sports hi lehkha thiam thei lo leh zir peih lo te tih turah dah thin a ni a, sports pawimawhna leh ngaihhlutna hian hmun a luah tlem hle a, hei hi sports pawimawhna leh tangkaina kan hriat loh vang pawh a ni mai thei.
Khawvel mihring thang zelah sports pawimawhna leh tangkaina kan hre chho telh telh a, hetiang lama tui leh mithiam, rilru zau tak pu leh rilru seng nasa tak hotute avangin sports lamah hma a sawn nasa em em a, tunah hian naupang tam takin an chhawr tangkai hle a ni.
SSA leh Sports
Mizoram hi tleirawl sualna hrang hrang, ruihhlo leh chin tha lo ngawl veina te, rilru piansualna leh beidawnna sualten a run mek a, hetiang dinhmuna kan din avang hian naupang thang laite rilru, thlarau, ngaihtuahna leh taksa thanlena atana pui theitu ruahmanna tha kan mamawh tak zet a, ngun taka ngaihtuahin Mizoram SSA chuan ruahmanna (project) siamin, sorkar laipui pawmpuiin Sports Academy hi M/S Leh P/S zirlai naupangte tan a lo din ta a ni.
Theme: Catch them Young
A tumte: Heng sports Academy-in a tumte chu:-
1) Rilru sang tak leh inthunun theihna te, kan hnam rohlu - tlawmngaihna te, rinawmna te, huaisenna leh ram leh hnam hmangaihna te naupangte rilrua tuh ngheh.
2) Insawizawina dik leh mumal tak hmanga naupangte rilru leh taksa thantir.
3) Naupangte'n ngaihsan tur dik ngaisang a, chin da (habit) tha an thanlenpui nana kaihhruai.
4) Naupangte nihna tak leh talent haichhuahsaka kaihhruaina mumal tak hmanga talent tihpunsak
5) Naupangte an lehkha zirna kawnga tihchangkana, sports hmanga lehkha thiamtir.
Engvangin nge SSA-in sports a buaipui?
SSA hian zirna tha, tluantlin leh rintlak naupang te'n an neih theihna turin theitawpin hma a la a. Hemi tihlawhtling tur hian kawng hrang hrangin hma a la a. Heng hmalakna hrang hrang zingah hian sports hi a langsar ber te zinga mi ni ang. SSA Framework For Implementation (Amended till 31st March 2008) in a tarlan leh phal ang leh 'All Round Development' tih hlawhtlinna chi khat leh National Policy for Education pawhin a ngaihpawimawh em em, school naupang te tana Sports lam uar tur a tarlan bawhzuiin Mizoramah pawh infiamna chu school naupangte tan hman tangkai a nih theihna turin kalpui a ni.
SSA Plan siamnaah pawh sports academy din a nih theihna atan hian central sorkar pawhin Mizoram Plan siam hi a pawmpui thlap a ni. Central sorkar hian a pawmpui bakah SSA sum hmang hian sports bungrua leh hmanrua lei te, district leh state level-ah inelna neih pawh phalsak a ni bawk. SSA sum hmanga Sports Academy (Training Centre) din te hi naupang 9000 chuang deuh thawin an chhawr tangkai mek a ni. Mizoramin Innovative Education hnuaia sports academy a din hi India ram state dang te pawhin tha an ti a, Mizoram tih dan entawn hian Nagaland leh Bihar te pawhin Sports Academy hi din ve tumin hma an la ve mek. Mizoram tih dan zir chiang tur hian Mizoramah pawh an lo kal tawh nghe nghe niin SSA lam hotu te chuan an sawi.
Football Club hi le?
SSA Football Club hi June ni 12, 2007 khan din a ni a. National Policy On Education (NPE) leh National Curriculum Frame Work (NRF) - 2005 te'n an ngaih pawimawh bawhzuiin SSA hnuaia Innovative Education hnuaiah sports promote na turin project siam a ni.
Central sorkarin a aprroved angin din nghal a ni. SSA Sports Academy din a nih hnuah Football Academy-a zirlai naupangte an lo than zelna leh an kal zelna turin SSA Football Club hi din a ni. Trainer leh assistant trainer, football thiam tak takte lak an ni. Anmahni an fit zel nan leh SSA Football Academy-a naupangte'n phurna an neih theih nan te, district hrang hranga Football Academy te tihphur nan leh hmasawnna an neih theih nan Promotional Tour te nei turin SSA Football club hi din a ni. Team tichak turin pawn lam mite pawh lak an ni ve bawk. SSA Football Club hi nakin lawka SSA Football Academy atanga zirchhuakte khelhna tur atana lo ruahman lawk a ni.
Engtin Nge An zir?
SSA hnuaia Sports Academy-a naupangte hian Kar khatah ni 3 - Thawhtanni, Nilaini leh Zirtawpniah te an zir thin a, sikul nen a intihbuai loh nan zing karah zirtir thin an ni. Heng academy hrang hrangah hian trainer 1 leh assistant trainer 1 ve ve dah an ni a, academy pakhatah hian naupang 50 zel zir thei tura ruahman a ni. Heng naupang te hi diltu tam tak zing atanga Control Board-in a thlanchhuahte an ni.
Sports mai ni lo, zirna (academic)-ah pawh training pek an ni. Naupang thiam bik leh chherchhoh zel tlakte chu Mizoram chhung mai bakah state pawnah pawh thiamna sang zawk nei tura an training theih dan tur zawn sak zel tum a ni.
SSA leh IAYS
Heng Sports Academy te tihchangtlung leh tihhmasawn zel nan International Alliance for Youth Sports (IAYS), USA leh SSA Mission, Mizoram chuan February ni 18, 2008 khan thawhhona thuthlung (MOU) an ziak a. MOU-a tarlan angin IAYS hian infiamna bungrua chi hrang hrang an rawn thawn ang a, Sports Academy-a Trainer te training an pe thin ang tih chu a hlawhtlinna hmasa ber atan June ni 19, 2008 khan '3-days Training' SSA trainer-te hnenah an pe tawh a ni. Academy naupangte'n hlawkna an hmu mek zel a ni.
SSA Sports Academy hian hma sawn em?
SSA Sports Academy-a zirlai naupangte zingah hian District level, State Level leh National Level thleng pawhin hlawhtlinna nei an awm nual tawh. State chhungah ngat phei chuan an kum rual puite zingah SSA Academy-a naupang zirlai te hi tluk loh enin an en ti tih der tawh a ni ber mai. Chutih laiin zirna an thlahthlam phal a ni lo a, academy naupang an zirlaia hmasawn lo te chu sports zir chhunzawm phal a ni lo. Hei vang hian SSA chhuah hma leh chhuah hnua zirna kalphungah pawh naupangte'n hmasawnna an nei mek zel niin a lang.
1. Lalkroshlua, Mamit District chu Asian Football Confederation (AFC) U-13 Football Festival June 16-25 June, 2008-a Tehran-a khelhah India aiawhin a kal.
2. K Zahmingthangi d/o K.Zahmingliana, Lunglei chu World Junior Karate Championship 2009 June thlaa Greece-a neih turah India aiawh turin National Camp-ah tunah hian a awm mek.
3. SSA Football Academy atanga zirchhuak mi pathum chuan tunah hian India rama Football Academy thate zinga sawi tel ve fo thin SAIL Football Academy-ah an awm mek.
5. SSA Academy naupang pahnih Lalrinpuia leh Lalnunhlua te chu India rama Table Tennis Academy tha bera chhal ngam Petroluem Sports Promotion Board , Ajmer, Rajasthan-ah an awm mek.
6. SSA Football Academy naupangte Mizoram chhung chauh ni lo, India ram hmun danga Academy tha zawka an awm theihna turin kawng zawnsak an ni. Kum 2007 khan India rama Fotball Academy tha ber pawl leh changtlung ber pawl Chandigarh Football Academy te chu biakpawh an ni. Chandigarh Football Academy hi India hmar lam naupangte pual chauha ruahman a ni. Mizoram SSA hotute'n thahnemngai taka an dawr hnuah an academy-a awm tura trial neih an rawn phal a. Mizo naupang 15 zetin trial an neih hnuah naupang pasarihte chu Chandigarh Fotball Academy-a awm turin thlan a ni ta a ni. He Academy-ah hian Mizo naupang dangte pawh trial nei tur hian sawm an ni ta zel a. SSA naupang Chandigarh Football Academy-a awm te hi kum tin Germany-ah training neiin an kal thin a. SSA naupang te pawh Germany-ah training neiin vawi thum lai an kal tawh a ni. Tunah hian Chandigarh Football Academy-ah heng mite hi an awm mek:
1. KC Lalchhuanmawia - Aizawl District
2. Abraham Lalringheta - Aizawl District
3. H.S. Lalthazuala - Aizawl District
4. Lalnuntluanga - Aizawl District
5. Zothanmawia - Aizawl District
6. M. S. Dawngliana - Aizawl District
7. Lalramzauva - Aizawl District
8. Daniel Lalhlimpuia - Serchhip District
9. Lalruatthara - Champhai District
10. Samuel Lalmuanpuia - Aizawl District.
No comments:
Post a Comment