Phailama Hnazawn A Him Em?

Kan ram kilkhawr leh intodelh lo zet mai hi, tunhnaiah sumdawnna khawvelin min rawn hrut ve tan a. Kan ram pachhe tak chuan thangthar zawng zawngte hna a pek theih tawh miau loh avangin kan mangang a, kawng dang kan dap tan ta ruai mai a ni.

Hemi hrinchhuah chu ram pawn lama hna zawn kan intihhmuh ta viau hi a ni. Globalization kalchho mup mup chuan kimchang lo takin remchang min rawn hawnsak chu ngaihtuahna thuah hnih hmang hman lovin kan bawh rum rum a, mi tam tak chu kan inchhuih tlu pheng phung mek a ni.

Mizo thalaite'n harsatna an tawk a, chu chu hna van vang a ni. He harsatna sutkian theih a nih beiseiin mi thenkhatin hma an la thin. Mizo thalaite tan hna ropui tak tak an thawk thin ngei mai. Hetih lai hian mi dang thenkhat chuan remchang an lo melh ru ve ru ran bawk. Phai lama zirna emaw hnathawh tur emaw kawhhmuhtu consultant agency an tih ang hi Mizoramah pawh an awm ve ta fur mai.

He'ng consultant agency-te hian call centre-a hnathawk turte leh security guard tur te, foreign rama hnathawktu tur leh thil hrang hrang atan an inzuar mek zel. Anmahni kaltlang hian thalai tam takin hna tha tak tak an hmuh mek laiin inchhuih buai sawi tur tam tak an awm mek bawk.

Tun hnai lawkah pawh hetiang chi ‘agent’ pakhat chu Aizawl khawpuiah ngei hian man a ni. Chuvanga timna erawh a awm chuang lo niin a lang, chanchinbu lama inzawrhnaah chutianga hna hmuhsak thei chu an la awm zel, an awm tur pawh a ni bawk a.

Kan tih ai min tirh sak turin consultant agency hrang hrang an awm. Hengho kaltlang hian awlsam zawkin engkim mai a tih theih ti tih tawh. He'ng zinga kan hriat lar ve mek chu hna pe thei nia inzuar thinte hi an ni.

Job placement agency-te chuan company hrang hrangte mihring mamawh an lo thlithlaipui a, hnathawk tur mihring an lo zawnsak thin a ni. Hna zawnsaktu an nih avangin company atang chuan hlawkna engemaw zat an lo tel chhawng ve leh ta thin a ni.

Phai lamah leh khawvel ram tam takah chuan hna zawn dan kalphung hi consultancy service kaltlang deuh veka tih a ni fur tawh. Phai ram khawpui lianah chuan hetiang consultancy service hi kawtthler tin deuhthawah an awm a, thalai tam tak tan pawh hna zawn a awlsam phah em em.

Hetih lai hian consultant agency rintlak lem loh engemaw zat an awm tih hi kan hriat a tul. Thiam takin mipui hnenah an inzuar a, pawisa an duh zat zat an deposit tir hnuah customer-te duh ang tak pe leh si lova thamral mai mai ching an tam hle. He'ng mite avang hian thalai tam takin harsatna an tawk a. India ram chanchinbu hrang hrangah pawh hetiang buaina hi hmuh tur a awm fo thin. Tlem lai deuh khan Mumbai khawpuiah chuan company 62 ngawt mai te chu labour law dan kalha private security agencies atanga security guard la an nih avangin thubuai awrhtir an ni.

Hemiin a hrinchhuah pakhat chu Human trafficking hi a ni. 'Globalization' atanga inkalpawhna tha zawk hian kentel a neih chu mihring tawlhrukna (Human trafficking) a ni. Kan thenawm ramah, a bikin Manipur leh Nagaland-ah te sawi tur a tam hle tawh. Meghalaya-ah pawh a nasa a, tlem lai deuh khan Naga nula pakhat chu Malaysia rama nawhchizawrhna hmun atanga chhanchhuah a nih kha.

Hetiang thil a thlenna chhan ber chu ram pawna hna zawn leh a kaihnawih thil a ni. Hna tha tak pek tiamin tlema hriatna nei tlem zawkte bum an ni thin. An hnathawhna tur hmun an hruai thlen meuh chuan mi thenkhat chu nawhchizawrhna hmunah an lo hnuklut lui tawh mai thin a ni. Delhi-ah pawh Mizo nulate ngei chu hetiang hian hnuhluh tawh an ni tiin thudawn pakhat chuan a sawi.

Kumin kum tir lam khan Mumbai khawpuiah Mizo nula tleirawl parukte chu hna tha tiamin Mizoram atangin hruaihlak an ni. An hnathawhna hmun an thlen hnuah an beisei ang an hmu lo a, nawhchizawrhna hmun lamah hnuhluh tumin room chhungah an kalhkhum hmiah a, thil pawi a thlen thui hmain Mumbai Mizo thalai thenkhatin an va chhanchhuak hman hram!

Mizoram chhungah ngei pawh Job Placement Consultant an awm ve ta nual. A lo buaipui tur pawhin Mizo ngei an nei ve fur tawh hlawm. Rintlak an awm, rintlak hauh loh pawh an awm tih hre ta phawt ila.

Heti lam zirchiangtu research scholar H Vanlalhruaia chuan, “Mizorama Placement consultancy firm lo awmte hi din theihna license / phalna emaw registration fel tak nei an ni em tih te, an nei lo a nih chuan dan kalh a ni thei mai em tih te a ni. Legally correct leh legally incorrect hriat chian hmasak a tul a ni ber mai,” a ti.

“Consultancy firm leh hna hmuhsakho hian eng contract / inremsiamna nge an neiha, documentation tih a ni thin em? Tih lo ni ta se, an contract / inremsiamna leh an awm dan emaw thawh dan a inmil em? Inmil lo ni ta sela, document proof a awm ngei em? Tin, hei bakah India ram state dangte hi population hrim hrimah an tam bakah human resource/labour lamah an sang hle a. Hetih laia labour/HR nei tlem zawk tura ngaih Mizoram state-te tak te atanga mihring an duh tan viau mai hi eng nge a chhan ni ber le? Labour tlawm lehzual an umna mai a ni thei ang em?” a ti bawk.

Vanlalhruai chuan sawi belhin, “Sum hmuh theihna tur a nih dawn phawt chuan, kan Mizo-pui ngeite inchhuih palh theihna turah pawh chetlak kan hreh meuh tawh lo. |henkhat phei chu nawhchizawrhna hmunah hial kan intir mek a nih hi. Hetiang khawvel tawp taka awm kan nih miau avang hian Mizo nih vang hrim hrim vanga inrin nghal em em hi a him ber tawh em aw tih hi ngaihtuah tham a ni ta. Mahni Mizo-puite rin loh tur tih lam sawimawina a ni lo, fimkhur a tulzia tarlanna mai a ni e,” a ti.

Phaia hnazawng tura kal zingah harsatna hrang hrang tawk tawh leh tawk mek hi sawi tham fe mai an awm. Tun hma lama harsatna tawkte'n tlawm leh zaha an lak thin avangin an sawichhuak tha duh meuh lo. Mumal taka chhinchhiah fel vek a harsa hle a ni.

H. Vanlalhruaia chuan, “Tun hnai lawk khan Hyderabad Mizo buaina nei mekte chanchin mumal zawka document theih beiseiin video camera nen kan va veh a. An remti ngang lo a, an awmna hmun remchang apiang kan cover ta ringawt a. Nikum lam khan Manipur-a Zohnahthlak unau pakhat, security guard thawk mek chu an awmna hmunah chesualin a boral phah hial tawh a. An awmna hmun kan va kal tlawh ni chuan, slum area aia hmun chhe zawkah an lo awm a ni,” a ti.

Hman deuh lawkah khan Hyderabad hmunah security guard tur an tirhte chu nasa takin an che buai tawh bawk nia sawiin, “|henkhat phei chuan kut an tuar a, phuar hlawm chungin inchhungah kalhkhum an ni. Hyderabad Mizo Association leh MZP hmalaknain Mizo tlawmngaite'n an va chhanchhuak thei hram a ni,” a ti.

Hemi hnu pawh hian Hyderabad hmuna security guard tura Mizoram atanga an hruaithlakte chu an che buai leh niin a sawi bawk.

Foreign ram thenkhat - Singapore leh Malaysia-ah te pawh Mizo chebuai fe fe an awm tawh. Delhi, Bangalore, Mumbai, Hyderabad Mizote phei chuan tualchhung chanchinbu-ah press release siamin fimkhur a tulzia an tlangaupui nasa hle tawh. Mahse, kan harhchhuah zo lo nge, kan mamawhnain min nawr thlu ngang tih hriatthiam a har hle.

Sorkar pawh a fimkhur hle a tul nia sawiin Vanlalhruai chuan, “Phai lam atangin Job Placement Consultants nia insawite'n an dawr reng rengin engkim chiang taka an hriat chian ngei loh chu rin mai tur a ni lo ang. Tin, kan thalaite an chetsual lohna turin engkim chiang tak leh indelhkilh thlapna (document mamal tak) hmangin contract an lo sign ngei tur a ni. Engemaw a kalsual a nih pawhin document hmanga siamrem lehna chance a awm dawn a ni,” a ti.

Sorkar department thenkhat hmalakpuinain India ram mai ni lo, foreign ram thlengin lehkha zir tura thawnchhuah kan awm ve nawk tawh. Mahse, beisei ang leh an lo tiam ang hmu zo si lo hi tam tak an awm a ni. Institution tha tak sawihmuha a hmun an thlen hnua institution chhe deuha dah leh si pawh sawi tur an awm. Hetianga tang laklawh tawhte hian a buaipuitu sawisel an hreh leh tawh si thin. Tin, chhungte'n pawisa an sen hnem avanga inthlahrun avanga tui lo tak chunga lehkha zir pawh sawi tur an awm nawk mai.

Sorkar kal ta hun lai pawh khan call center-a thawk tur tiin thalai rual a sang tel teh meuh pawisa tam tak sengin department pakhat kaltlangin training tir an ni a, hlawk thlak loh tak a ni. Thawhna tur mumal an hmuhsak thei lo a, an hmuhsak chin te pawhin buaina namen lo an tawk zui.

Mizo thenkhat, hnathawk tura phai lama kal, haw leh hreh emaw zak tawh si hna duhawm lo deuh deuh thawh zawm ta an awm leh zel bawk. Heng zawng zawngah hian kan sorkar hian kalphung felfai a neih a ngai. Job Placement Consultants-te Mizoram-a lo chuang chhuak te pawh sorkar pawmpui thlap ni thei se.

Hna zawng tura thawnchhuah tawh kutbenga haw leh zawng zawng hi bumna vang an ni kher lem lo tih erawh hriat a tul. Consultant-te dem vek tur pawh a ni lo ang. Consultant te'n an tiam ang an puitlina, placement-a an lungawi loh vang emaw an thiam tawk loh avang emaw a ban ta mi tam tak an awm ngei mai.

Hemi chungchangah hian Vanlalhruaia chuan, “Mizo hi kan taima kan ti thin, mahse, hna sang emaw vawi-leh-khata hlawk thut theihna tur um ching kan tam em em. Phai rama hna nei thawk tha peih lo, an ban leh tak Mizo ka hmu nual tawh. An ban chhan hi anmahni chuan an insawi thiam em em thin. Hnam dang an nih avanga duhsak an nih thin loh thu te, hrehawm an tihzia hlir te a ni mai thin. Zep thu awm suh, kan thatchhiat vang leh Mizorama kan hnathawh dan anga hnathawh kan tum tlat thin vang a ni fo. Hnam dang kan nih avanga min lo duhsak ta lo deuh a nih pawhin, eng nge sawi theih kan neih chuan le? Kan hnathawhna khawtlang mil hna thawh kan zir hma chuan eng kan ang tak tak ngai lovang,” a ti.

“Kan society hrim hrim hi hnam dang kara tlatlum taka khawsa thei nghal tur chuan Mizorama kan inenkawl dan hi kan tihdanglam hmasak a tul. Zorama kan thalai tam takte khawsa zia leh nunphung hi phaia inhlawhfa pangngai ni tur chuan a no lutuk hret thin. A bikin hna hniam deuha ngaih tan phei chuan kan hlawhchhuah leh an nunphung a inmil thei meuh thin lo. Vai leh Nepali-te khawsak dan hi entawn tlak tak a ni. An inren em em a, an thawh tawhnaah chuan rinawm takin an thawk a, zurui chung leh zelthel takin an thawk lo a, hei hi kan Mizo thalai tam zawk hian kan la tlin meuh lo a ni mai thei. Zelthel taka ti thinte tan chuan chance a awm rei lo hrim hrim mai,” a ti bawk.

Nula thenkhat, call centre-a thawk tura lak, thla hnih khat hnua thawhpui vai laka rai haw ta mai mai pawh sawi tur an awm.

Vanlalhruaia chuan, "Phai lama chebuai zingah a lehkhathiam leh degree sang zawk nei ai chuan, tlema degree nei hniam leh 'unskilled labour' rawn tlan thla te hi an chebuai zual chawk. Hriatna lamah kan lo pechhe zawk nge nge thin hian humsual min dai tir thin a ni,” a ti.

“Buaina kan tawh tawh hnu hian khawngaih thlak chan an chang zo vek tawh zel si. Amaherawhchu, Mizoram atanga thil kan lo hriat hi a famkim tawk lo tih erawh i pawm ngam teh ang u. Mi thenkhat, mahni qualification leh nihna pawhin a phak reng reng loh beisei lui tlat te pawh kan awm zu nia!” a ti bawk.

Kan tunlai khawvel kalphungah chuan Mizo pa tawngkama “pianpui degree nei” tih te chu tih mai mai a ni. Mahniin sumdawnna din thei khawpa pawisa kan nei a nih ngawt loh chuan degree puitling tak nei lo tan kawng a kaw meuh tawh lo. Unskilled labour hna thawk tur tan phei chuan Mizoram tluka hlawh thatna hmun a awm lo. Hlawh tlem tawh nak laiin ram dangah chuan Tax kan pek a la ngai zui nen. Mizoram atangin hlawh zat tur an sawi thin pawh tax pek hnuah chuan a tlem kuar tawh mai thin.

Khawpui lianah phei chuan in luah man (electric bill, Tui bill) hautakzia hi kan hriat a tul. Unkilled labour tan phei chuan accommodation tha lutuk beisei chi a ni lo. Phai lama unkilled labour tam tak paw'n an nei miau hlei nem, hengho dinhmun kan tawmpui theih loh avang hian alawm, Mizo tam tak chu an hlawhchham fo thin ni le. Pawisa nei mumal lova ram danga chhuah phei chu kawng a ping duh hle.

Vanlalhruaia chuan, “Mahni dinhmun kan hriatchian mai bakah ram dang dinhmun hi chiang zawkin i zir ve teh ang u. Kan mamawhna a inchen hauh lo ang, mahse, hna hniam lam zawnga phai rama kal hi a hrisel ber lem lo tih hi i hre ve tawh teh ang u. Hrehawm tawrh te, vai artui zuar anga hnam dang tihduhdahte tuar thiam zel te kan la zir thiam a nih ngawt loh phei chuan, Zoram pawnah hian hna zawn hi intihmuh chi a ni ber em tih hi i inngaihtuah ngun ang u," a ti.

"Engpawhnise, invenna kawng hi kan ngaihtuah a hun a ni. Hnazawn hi thil pawimawh tak a nih avangin kan uluk a tul. Thil hrechiang hmasa zet lova thil bawh rum rum hi kan sim tur a ni. Kan hna zawn hrulah thil tam tak a awm tih kan hriat a tul. Kan hnathawh tur mai ni lo, kan va awmna tur khawtlang ziarang leh an hnathawh dan kalphung thlenga uluk taka kan zir a tul. India ram khawpui lian leh foreign ram thlengin Mizo/Zo hnahthlak khawtlang pawl an awm deuh zel tawh. Thil chinchang hre lo tan phei chuan kan kal hma ngeiin hengho hnenah in-report hi a him ber a ni. Mangan hunah kan pur buai leh ziah tho. A hma lamin chanchin inhrilh hi chin thin a tha hle, “ a ti bawk.