Mizoramah Kristianna a nghing em? Mizo tawngin Hindu lehkhabu thianghlim

Mizo zinga Hindu sakhaw thehdarh tum an awm tih hi chu tun hma deuh atanga hriat tawh a ni a, tlema hawizau deuhte phei chuan a taka an hmalaknate pawh sawi tur an hre nual tawh. Tun hnaia Hindu sakhaw lehkhabu Srimad Bhagavad Gita Mizo tawnga lehlin a lo chhuah takah phei hi chuan he boruak inmun mek hi a puak keh tan ta niin a ngaih theih ta hial mai.

Mi tam takin kan hriat loh lai hian Mizo zingah Isua Krista aia Krishna thlang zawk engemaw zat an awm tawh a, Kristian sakhua bansana Hindu-a inlet an awm tawh mai a ni lo a, hindu sakhaw thehdarh tura inchher mek te pawh sawi tur an awm nual ta.

Mizote Hindu sakhuaa inlehtir tumna thawm hi a rikna chu a rei tawh a, naupang leh thalai engemaw zat chu phaiah Hindu pawl thenkhatin lehkha an zirtir a, an chawm tih te pawh sawi a ni fo thin.

Engemaw laia yoga a lo lar chiam pawh khan Kohhran tana mi thahnemngai thenkhat chuan an lo chhui zui nghal a, mipui nawlpui hriatah Hindu sakhua nen a inkungkaih dan te, thiam taka sakhaw thehdarhna hmanrua a nih thu te an sawi tak hnuah a dai leh ta a nih kha.

Presbyterian Kohhran pawhin Mizoram chhunga sakhaw dangte hmalakna zirchiangtu tur committee hial a lo din tawh bawk. Ama'rawhchu, hmalakna lian tham erawh an nei zui lo ni awm tak a ni.

Bhagavad Gita Mizo tawngin
Engemaw lai khan hindu sakhua thehdarh tuma hmalatuten an lehkhabu pawimawh ber pakhat Bhagavad Gita chu Mizo tawngin an let zo vek tawh tih Zozam Weekly-in a hria a, hun engemaw chen hnu, tun hnaiah khan he lehkhabu hi neih theih a lo ni ta. A buatsaihtute thil tum lam ngaihtuah lem lo pawhin sakhaw lehkhabu pawimawh tak mai a nih avang hrim hrim pawh hian buaipui tham chu a ni ve awm e.

'Gita' Mizo tawng hi phek 209-a chhah a ni a, a kawm khawng niin, copy 1000 chhut a ni. A kawm khawng, phek 209-a chhah chu Rs 20 man lek a ni thung!

Mizo tawnga letlingtu hi Ramthanga Khawlhring a ni a, Heritage Foundation (Guwahati) chhuah a ni. Kum 2007-a chhuah niin a bu-ah hi chuan a inziak.

He sakhaw lehkhabu-ah hian thuhmahruai ziak an awm nual a, chungte chu Nunna Lalhnam mi leh sate vek an ni. Anni bakah hian a chhuahtu Heritage Foundation aiawhin Prof. Raghudev Goswami leh a letlingtute'n an ziak bawk.

Gita hi philosophy leh literature lamah pawh duai lo tak mai, chutiang atana zir tham chu ni mah se a buatsaihtute hian chutiang chu an tum a nih lohzia leh Hindu sakhaw thehdarh tumna hmanrua a nihzia chu thuhmahruai ziaktute tawngkam atang hian a lang chiang viau a ni.

A letlingtu Ramthanga Khawlhring chuan, "...he lehkhabu-a thute hi lei leh van innghahna, Chatuan Minung Thuchhuakte an nih avangin, a neitu Chatuan Minung hnenah lawm takin ka hlan let e," tiin thuhmahruai tlang a kawm a ni.

Rorelliana, Lal puithiam, Mizo Hnam Sakhua pawhin, "Ram leh hnamin a nun kawng dik a zawh a, hnam a lo hmuingilna tur leh mihring hriatna piaha Chung Khuanu - Khuavang ram rel, hnam hnena pholan a duhnate hailanna lehkhabu chhuah a lo ni ta mai hi hnam vanneihna kawng hawngtu lo ni zel sela," tiin malsawmna a ziak.

"Gita bu hi uluk takin ka chhiar a, hnam damna tling thu hluin a khat ni berin a lang," tiin H Chawngpianga, Lal puithiam, Nunna Lalhnam pawhin malsawmna a ziak.

C Vanlallawma, President, Janajati Vikas Samiti, Mizoram pawhin 'Duhsakna thuhma' tiang hian a ziak:

"He lehkhabuah hian engkim dintu leh duang chhuaktu, thil tinrengte nih phung ruatsaktu, chatuan minung khuavang-in hring fate nun kawng a lo rel dan leh hman chhuah dan tur fiah takin tarlan a ni a. Nung tinreng hmanga inpuang 'Khuanu' chu khawvelin an hmuhfiahna tur lehkhabu tha tak ni turin duhsakna ka hlan bawk e," tiin.

Gita thuhmahruaia hnam tinte malsawmna ziaktu B Lalthlengliana, Vice Chairman, Nunna Lal hnam (Saron veng, Aizawl) chuan, "Lalpa (khuavang) chu Lal a nih anga a inpuannate chunga a ropuina chu lang zel se, hnam tinte a siam anga mahni nih dan theuhva a kohna hretute malsawmin awm se..." tiin a ziak.

A bu chhung tir lamah hian Gita ropuizia ziahlan a ni a, "...he lehkhabu ang hi a vang hle a, lehkhabu dang, sakhaw lehkhabu-a mi ngaih leh pawmte pawh hi han belhchian chuan tisa khawvel leh a piah lam nawmchenna neih theihna tura zirtirna a ni deuh tlangpui a, finna kawng zawh ai chuan rin thu a kal ngaihsanna lehkhabute an ni," tih thu awmze nei tak ziah a ni.

Gita Mizo tawnga a awm ve hi a hnawksak tihna a ni lo ang a, literature tihausatu pawh a ni zawk mai thei. Mahse, a buaipuitute leh a phena thil awm ni awm taka langte hi rawngbawltu thenkhatin an ngaimawh lai chu a ni. A buatsaihnaa hmalatute leh thuhmahruai ziaktute hi hmanlai Mizo hnam sakhua chawilar duhtu an ni, tiin thudawn pakhat chuan a sawi.

Mizoramah Hindu sakhua thehdarh an tum
Mizoramah hian Hindu thehdarh tuma thahnemngai taka beitu an awm reng a, an zingah hian sorkara mi langsar tak takte pawh an tel nia sawi a ni. Sum pawh an chelek viau nia sawi a ni a, hman deuh lawka hemi chungchang rawn lar hluai pawh kha an hmalakna nia sawi a ni nghe nghe.

India ram hi sakhaw zalenna ram a ni a, mi tu pawhin a duh duh sakhua a zawm thei. Chumi denchhen chuan sakhaw hrang hrangte hian tan an la tlang vek tiin a sawi theih ang. Chutihlai chuan state thenkhatah chuan sakhaw danga inleh khapna dan te hial an siam avang leh tihduhdahna rapthlak takte a awm fo avangin Kristian missionary-te'n harsatna an tawk thin. Nikum lawkah pawh khan Orissa-a Kandhamal district-ah chuan Hindu firfiakhoin Kristiante an sawisa nasa hle a nih kha.

Danin a phal miau avangin Mizo zinga sakhaw dang vuan an lo awm hi khap ngawt theih a ni lo ang. A nihna takah chuan pawl thenkhat phei hi chu Kristianah an inchhal lo mai a ni lo a, Mizote Kristian sakhua bansantir tumin hma an la zawk a ni.

'Hinduism' hi mi tam tak chuan sakhua leh hnam nunzia (culture) inkawp niin an ngai a, a dikna thui tak a awm. India hmarchhak pumpui leh Mizorama hindu sakhaw thehdarh tuma hmala mekte pawh hian pi pute sakhua an sawi vawng viau a, a langa paua hindu a inlehtir hi tum ber a ni lo a, hmanlai sakhua theuha kirtir leh hi an tum zawk chu a ni.

India hmarchhaka Hindu thehdarhna atana hmalatu pawlte hian fing takin hma an la a, state tinah sakhaw behchhan pawl hrang hrang (Kristian ni si lote) nen an thawkho a, sum leh thil dang pawhin an pui mai thei e. He'ng pawl hrang hrang - Janjati Faith & Culture Protection Forum, Vanvasi Kalyan Ashram, Seva Bharati, Heritage Foundation, VHP leh RSS te hian tlang mite an sakhaw hluia an kir leh theihna turin hma an la reng a ni.

Hindu pawl hrang hrangte hian India hmarchhak state tinah hian thawhpui (pawl/kohhran) 34 lai an nei a, Mizoramah pawh chutianga thawhpui chu 5 an nei a, chungte chu - Nunna Lal hnam (Mizo hnam sakhua - Nunna Lalchhungkua); Shavei Israel; Mizo Kohhran; Bnei Israel leh Lal chhungua Unity te an ni.

Heng Mizorama an thawhpuite thu ken ber hi a chunga kan sawi tak ang hian hmanlai kan pi pute sakhua leh pathian (Khuanu, Pu Vana, etc.) biak leh hi a ni. Langsar takin Isua Krista leh Bible an sawichhe bawrh bawrh fo a, an thuziakah pawh Kristian sakhua an bei viau a ni.

Gauhati atanga chanchinbu chhuak pakhat 'Heritage Explorer' hi tuna kan sawi lai - Hindu sakhaw thehdarh tumtu leh chumi atana hnam sakhua buaipuitute nena thawkho pawl pakhat Heritage Foundation tihchhuah a ni. He chanchinbuah hian Kristian missionary leh rawngbawltute chanchin a chhe zawnga ziah a ni fo a, thiam takin India hmarchhaka chengte hi pipute hnam sakhua kirtir leh tumin hma an la a, chu chu an thuchhuah thin atangin a hriat hle a ni.

Engpawhnise, hindu lehkhabu thianghlim pakhat Gita chu mi thenkhat zarah Mizo tawngin a lo awm ta a, la darhzau vak lo mah se mi tam takin an kawl fur tawh nia hriat a ni. Hemi chungchangah hian Kohhran hruaitute leh rawngbawltute ngaihdan hriat a ni lo na a, Kohhrana mi thahnemngaite chuan an enghelh viauvin a rinawm.

Mizote hi sakhuaa nghet ru ang reng tak mai kan ni a, ni tin nun leh thil dangaah chuan Kohhran mi nihna te hi ngai pawimawh vak lo tam mah se naupan teta baptisma chang leh inkhawm thinte lo nih thinna hi (sakhuana thilah chuan) a lang thuai zel a ni.

Hindu sakhua hi vai sakhua anga ngaih a nih avang leh Hindu pawl thenkhat (VHP, RSS, Bajrang Dal, etc.,) te chet dan te, India ram hi Hindu rama lehtir tuma politics hmanruaa hmang an lo awm mek bawk avang hian tuna Gita bu Mizo tawnga lehlin lo chhuak ta pawh hi mi tam tak chuan an ngai thutak viauin a rinawm. Kum tir lama chief minister-in New Delhi-a Mizoram House thar tur lungphum a phum tuma vai (Hindu) tih dan anga coconut a sawhkeh ve tum pawh khan mi tam takin an helh hle a nih kha.

Bhagavad Gita chu
Bhagavad Gita hi Hindu lehkhabu thianghlim ti ila a chiang mai awm e. Hindu scripture pawimawh ber pakhat a ni.

'Bhagavad Gita' tih hi Sanskrit tawng a ni a, 'Song of God' (Pathian hla) tihna a ni.

Hindu lehkhabu thianghlim mai a ni lo, khawvela philosophy lehkhabu lar ber pakhat a ni.

'Song of God' tih takah, he lehkhabu hi hlabu a ni a, hla 700 a awm.

Hindu-ho chuan pathian hi Krishna hmangin a inpuang tiin an sawi a, an rin danah chuan pathian hi Krishna-ah a chang an ti. Krishna zirtirna chu an zui a, Bhagavad Gita pawh hi Krishna zirtirna a nih avanga ngai ropui an ni ber.

Bhagavad Gita-a hlate hi Krishna leh Arjuna inbiakna a ni a, lal fapa Arjuna hi Kurukshetra war hma lawk khan, indona hmun pakhatah rilru lama harsatna tawkin a awm a, chutih laia Krishna nena an inbiakna tia sawi a ni.

Krishna hian Arjuna chu indomi a nihnaa tih tur leh lal fapa a nihnaa a mawhphurhna te a hrilh a, rilru lama harsatna nasa tak tawktu Arjuna chu a fuih a ni. Chutianga an infuihna vel chu he lehkhabu-ah hian a chuang a, mihring nun inkaihhruaina bu-ah Bhagavad Gita chu an ngai ta a ni.

He lehkhabu hi a ni Hindu-ho ngaihsan em em Yoga chungchang lanna chu.