Maksak 33

Pu Vr Pa
John Fitzgerald Kennedy (1917-1963), John F Kennedy tia hriat lar, US president hlui kha pa rilru chak zet mai, fiamthua mi han chhan zung zung thiam zet mai a ni.

A fanu Caroline-i kha duhawm tak, fing leh zei deuh mai a ni a, a pu (JF Kennedy-a pa) Joseph Kennedy pawh khan a chhuang thin hle awm e.

Vawi khat pawh Joseph Kennedy chuan a tunu chanchin chu chhuang deuh maiin John F Kennedy kha a hrilh malh malh a, "Caroline-i hi chu a smart a nia... Jack, amah ang rual i nih laiin hetiang hi i ni pha hauh lo a nia," tiin.

John F Kennedy chuan, "A dik ang, ka pa leh a pa han khaikhin paw'n a dik ang tih chu a chiang mai alawm," tiin a pa chu a chhang hlauh!


Hautak lo
1935-ah khan scientist hmingthang Albert Einstein-a chu Princeton University-ah zirtir turin a kal a, a mamawh tur an lo zawh chuan, "Dawhkan, ziahchhan leh pencil, chu'ng bakah chuan ka tihsual ka paihna tur bawm lianpui," tiin a chhang mauh pek a!


Kekawrte
Kum zabi 20-naa khawvel poet hmingthang TS Eliot-a kha, 1961-ah khan, vawi khat chu zirlai pakhat, America-mi hian a tlawh a, chu zirlai chuan Eliot-a chu ngaisang takin a poetry phuah dan leh eng engemaw a zawt luam mai.

An inkawm zo, zirlai chuan kal a tum ta. An inthlah lai chuan Eliot-a chuan thupui fun fahranin thil engemaw a hrilh a:

"Kum 40 zet a liam ta, Harvard atangin Oxford-ah ka insawn a," a'n ti a, thu pangngai a sawi dawn emaw tiin zirlai chuan a lo nghakhlel hle.

"Thurawn pek tur che pawh ka nei ve mial mai thei asin," a tih lai chuan zirlai chuan nghakhlel takin a beng a lo dawh ha mai.

Eliot-a chu a'n ngawi vang vang a, a tawpah chuan a thusawi chu a chhunzawm ta a; "Kekawrte sei chi i nei em?" a ti ta daih a!