¢ K Lalrochana
May ni 8 zan a ni a, Lunglei thalai rualte chu Saikuti Hall-ah an fuankhawm a, heng thalai, hall khat tlata fuankhawm zinga mi 540 te chuan nupui pasal an neih hma chu sex hmang lo turin Pathian hmaah an intiam.
Zotlang Pastor Bial TKP huaihawtin, May ni 8 zan khan Saikuti Hall-ah hian Mizoram Praise Gathering 2009 neih a ni a, he hunah hian Mizoram Gospel artist lar tak takte an zai bakah BCM Gen Secy Rev Dr K Thanzauva'n thuchah a sawi.
Rev Dr K Thanzauva chuan, tunlai thiamna hmasawn zel chuan thalai nun nasa takin a tichhe mek niin a sawi a, "Technology lo chhuak thar zel hi Pathian malsawmna a nih rualin, kan hman thiam loh chuan min tichhetu a ni thei a ni," a ti.
"Hmasawnna chhawr tangkai tur chuan a tha zawnga kan hman thiam a tul a ni," a ti bawk.
He hunah hian zaithiamte an zai bakah 'Nupui pasal ka neih hma chuan sex ka hmang lo ang' tia intiam ngamte tan sawmna siam a ni a, thalai 540 zetin sawmna hi an chhang.
Heng sawmna chhangte hi a tuk, May ni 9 khan BCM enkawl Higher & Technical Institutes, Mizoram (HATIM) building-ah counselling class neihpui an ni a, thianghlim turin an intiam tih entirnan Silver ring buntir an ni bawk.
Zotlang Pastor bial TKP president F Lalromawia chuan counselling class-ah hian an kal vek lo tih a sawi a, "A hmunhmain a zir loh avangin kan leng ta chiah bik lo a ni," a ti.
Counselling class kal hman ve lote tan hian kar hmasa Inrinni khan HATIM leh BCM Centenary Building-ah class hawn leh a ni a, class-a kalte hi thianghlimna zungbun hi buntir leh vek an ni.
F.Lalromawia chuan, Zungbun an buntir zawng zawng hi mi 308 niin a sawi a, "Damlohna avanga kal hman lo te pawh an awm," tia sawiin, Zungbunah hian 'Rom 13:14' tih an chhu kai tih a sawi bawk.
"Kan beisei aiin kan hlawhtling," a ti a, "A tirah tak chuan zungbun bun tur hi mi 50 aiin an tam kan ring lo a, mahse kan rin aiin an lo tam ta si a, kan order belh leh ringawt mai a ni" a ti.
"Counselling class-ah hian intiam leh ngam lo te chu huaisen taka inpuang mai tur te pawhin kan ti a, mahse an ti tak tak hlawm niin kan hria. Kan sawi ngun a, Zungbun hi Pathian hnena kan hlan thianghlim vek a nih tawh thu te pawh kan sawi a, mahse, kan thalai puite hi an ti mai mai lo niin ka hria, Counselling class-ah hian thutiam te pawh kan sawi rual leh vek a ni" a ti bawk.
Thianghlim tura intiam zingah hian zaithiam lar tak tak te pawh an tel a, Rosy K Remsangpuii, Maggie, Linda Fanai leh Bethsy Lalrinsangi te pawh zungbun bun zingah hian an tel.
Rosy K Remsangpuii chuan: "Khatia, thalai rual thahnem tak maiin Pathian sawmna an chhang kha ropui ka ti lutuk a, ka hnuk te pawh a ulh hial" tiin Zozam Weekly a hrilh.
"Kei pawhin zungbun hi ka bun a" a ti a, "Kan zungbun bun hi man to tak pawh a ni lem lo, mahse, he zungbun hian Pathian hnena kan intiamna kha min hriattir reng dawn a ni," a ti bawk.
Linda Fanai pawhin Zungbun hi a bun ve tih Zozam Weekly a hrilh a, "Zungbun hi chu a entirna mai a ni a, a pawimawh zawk chu Pathian nena kan inkar a ni a, Pathian hmaa kan intiam tawh chu kan tihlawhtling ngei tur a ni a, kan intiamna hriatreng nan he zungbun hi chu bun mai kan ni," a ti.
Hmanni ah Vagina Dentata tih film hi ka en a..a tirah chuan nuihzat tum lutuk in ka en a..:)))ka nuihazat tum aiin khami film in a kentel ve ninom tak..thalai ten a pasal neih hma a sex laka fihlim tur a an in tiamna kha tha ka lo ti khop mai a...Mizo te hian ti ve ta i la..KTP, TKP ang te pohin ti ila engemo chenah min phuar ang tiin..ka thiante nen pon kan lo discuss zui ve hial a.lunglei lamin tih nachang an lo hria chu an hmalakna tha ka ti top..Kan rama sex hluar ta lutuk hi chu engemaw chen a ven ve theih ka ring tlat...Biak In chhunga a thu mai a in zirtir ai chuan hei hi chu a that zak mah ka ring tlat
ReplyDelete