Wednesday, June 22, 2011

Chhuihthangvala te'n an chhuih zele

Mizote infiamna ngainat ber chu football a ni. Mizo mipa tawh phawt chuan an khel a ni ber. Mahse Football kan khelh \anna erawh a la rei lo. Kum 100 em pawh a la tling lo.
1954-ah Lalsangliana (Ex-MP), HK Bawihchhuaka, Lalhmingthanga (P&Sons) te leh midangte'n Aijal Sports Association an din a, anni hi Mizote tana football kawng sial hmasatute an ni. Football tihlar tumin chu pawl chuan theihtawpin an bei a, khatih lai pawha field \ha ber Lammualah heng hruaitu hmasate hmalakna hian football chu an khel ve \hin.

Kum 2001 kha Tata Football Academy a\anga S Malsawmtluanga (Mama) chhuah kum a ni. India rama club \ha ber ti hiala chhal ngam East Bengal a zawm a, Kolkata Derby-ah an hmelma kumhlun Mohun Bagan nena an inkhelh \um pawhin hnehna goal a khunga nih kha. Mama thawm chuan Mizo mipuite a tiphurin chakna thar a siam nasa hle.
Mama chuan India ram chhungah Mizote a pholang a, India ram football ngaihventute chuan Mizoram lam an hawi ta fur mai. Mama chuan Kolkata khawpuiah ngaihsan a hlawh a, a pet goal changin mipuiin an bawr nasat lutuk avangin thuhruk te pawh a ngai ta hial mai.'Tulunga' a ni emaw 'Mama' a ni emaw, S Malsawmtluanga chu Mizo tlangval a ni reng a, a ropui zual zel. Indian football lai lum laia Mizote hruai luttu chu Mama hi a ni chiang.
2001-ah Asian U-17 Football Championship-ah India aiawhin Jerry Zirsanga, Vanlalrova, Malsawma leh Lalmuankima te'n an khel a, anniho hian India team chu ropui takin an chetpui. Malsawma leh Jerry Zirsanga phei chu Asian All Star team-ah an lang nghe nghe.
2011 AFC Football Festival Iran-a khelhah India aiawhin Mizo naupang paruk ngawt an kal a, he intihsiaknaah hian India chu a che \ha hle. Mizo naupang parukte hi India team tichaktu an ni a, India striker Lalremruata leh midfielder Lalmuanzova te chu 'Best Players,' atan Asian Football Confederation experts te chuan an puang hial.
Tunah hian Mizo naupangte hmabak a eng hle; Zothanmawia leh Lalremruata te chu India aiawhin Arsenal Cup kel tura thlan a ni a, an vanneih hlauh chuan Arsenal academy-a awm tur pawhin an thlang lo ang tih tunge sawi thei. Shillong Lajong junior team-a khel mek Tlungvel naupang Jacob Lalrawngbawla pawh Bayen Munich-a training turin thlan a ni. Naupang beiseiawm dang an la awm nual bawk.
Mizoram chu 'football thiam state' tia hriat a ni \an ta. All India Football Federation pawhin Mizoram a hmelhriat tawh hle. Football hmasawnnaah hian media lam an thawk hlawk hle.
1954-a Aijal Sports Association dintute khan tuna Mizoram dinhmun hi an thlir lawk thiam kher lo ang a, hruaitu hluite kha la dam kim se, lawm avangin kut an beng ve ngei ang.
Read more...