COMPUTER THLUAK NEI TAK TAK

Khawvela computer khawl lama sulsutu company lar, International Business Machine (IBM) mithiamte chuan tun hnai khan thluak (brain) ang deuha hna thawk thei computer chip (microprocessor) an siam chhuah thar thu an puang. He electronics khawl hian nitin-a a thil tawn (experience) ang zelin thil thar a zir thei dawn niin an sawi.

He khawl, SyNAPSE system an tih hian computer chip pahnih a nei a ni.

Thluak hi nerve cell (neuron) tam tak inzawmkhawm a ni a; miin thil a zir belh zel hian chu?ng neuron-te chuan inzawm dan (synapse) chi? thar an siam belh zel a, thil kan hriat belh zel \hin.

Tuna khawl kan sawi mek hi chutiang ang deuha hna thawk tura duan ni mahse, chip-a electronics circuit-te chu an thil zir thar ang zela inzawmna insiam belh theih an nih ngawt loh avangin circuit awmsa-a signal chi hrang hrang-te chu thil an tawnhriat (experience) ang zela nasa leh nasa lo bikah hna thawk thei tura duan an ni a. Chutiang chuan ngaihpawimawh bik leh hnathawh dan phur bik chi thar insiam zelin, thluak angin hna a thawk thei dawn niin an sawi.

Tom Hanks-a'n ticket man pe let

Hollywood legend Hanks chuan a fan pahnihin a channa thar Larry Crowne hmuhnawm an tih loh thu an hrilh hnuah an cinema ticket man a pe let leh!

Tom Hanks, kum 55 mi hi California-a petrol station-ah heng mipahnih te nen hian intawngin, a film chu an en thu an hrilh a, eng nge a an tih a zawh chuan, "A hmuhnawm fahran lo," tiin an lo chhang a ni.

Chutia an tih takah chuan Hanks chuan, "A nih tak chu maw le, a pawi ka ti hle mai, in remtih chuan in ticket man ka lo kir leh mai ang che u," tiin a wallet a\angin dollar 25 a phawrh a, a pe ta a ni.

Larry Crowne film-ah hian Julia Roberts nen an changdun a, box office lamah pawh beisei a pha chiah lo a ni.

Hollywood legend Hanks chuan a fan pahnihin a channa thar Larry Crowne hmuhnawm an tih loh thu an hrilh hnuah an cinema ticket man a pe let leh!

Tom Hanks, kum 55 mi hi California-a petrol station-ah heng mipahnih te nen hian intawngin, a film chu an en thu an hrilh a, eng nge a an tih a zawh chuan, "A hmuhnawm fahran lo," tiin an lo chhang a ni.

Chutia an tih takah chuan Hanks chuan, "A nih tak chu maw le, a pawi ka ti hle mai, in remtih chuan in ticket man ka lo kir leh mai ang che u," tiin a wallet a\angin dollar 25 a phawrh a, a pe ta a ni.

Larry Crowne film-ah hian Julia Roberts nen an changdun a, box office lamah pawh beisei a pha chiah lo a ni.

Carey pasalin mi kuah hnem record siam thei lo!

Miriah Carey pasal Nick Cannon, America's Got Talent host chuan darkar khat chhunga khawvela mi chi hrang hrang kuah hnem ber record siam a tum a, a hlawhchham!

Cannon hian August ni 19 khan tiang hian a tweeter-ah a ziak (tweet) a, "hey NYC! Mi kuah hnem record siam ka tum a nia, lo tel ve rawh u."

Tichuan Inrinni (keini ramah Pathianni a ni tawh) khan New York-a Citi Field-ah Guiness Book of World Record (bamboo dance-a record kan siamna nen khan a record siam tumna hi a thuhmun a nih chu!) a lan tumin, darkar khat chhung chu mi chi hrang hrang a kuah ta mawlh malwh mai a ni.

Darkar khat chhunga mi kuah hnem record singlai chu 1,749 a ni a, he record hi Cannon hian a pha ta lo. Mahse, a record siam tum hi naupang dam lo ten an hlawkpui ve thung a, mi pakhat a kuah zelah Met Care Room, New York Hospital of Queens a naupang dam lo tan toy pakhat an donate zel a ni! Nick Cannon hian mi engzat chiah nge a kuah hman tih kan thu laknain a tarlang tel tlat lo!
n

Nui hiau hiau, Nui tut tut

A thau lutuk a, a hnar a pil vek.
- 8575186390

Kan awmpui pawh Hei den rial-in a chiah hneh hle a ni ang, 'Oval' a ti reng mai
- 8575187407

Vincy-a hla- 'Ka thisen leh taksa' tih kha a lo hresual pek a, "Ka thisen leh zakkha..." tiin a lo sa ve chiam chiam.
- 9436159317
Anna Hazare hi Mizote chuan kan \an ngei tur a ni; kum 4 vel liam taah khan Mami Varte chuan, "Anna e, phurh zawh loh zuna uai chu..." tih hla a lo sa daih tawh tlat.
- 8974589540

Ninja pawl pakhat pawh kha an camp-a an awm laiin an boss khan a kid pakhat hnenah, "Tui min han suah teh," a ti a, chu ninza chuan a hmai a lo tuam mar lutuk a, "Yet Bot," a ti vel!
- 9862751603

Tunlai hian Japan mithiamte'n TV chi thar, mit-in a huat loh tur chi siamchhuah an tum a, a dangdai awm khawp mai, a lem tel lo, a ri ringawt a ni dawn! Boxing te pawh kan ngaithla \hup \hin dawn ni awm tak a ni. Mit chuan a haw lo ve khawp ang.
- 9612566920

Zu rui pakhat pawh kha an sual mai mai, Nu-i chaw ei min han siam teh, mahse ka ei lo vang, te a ti vel.
- 9862375770

A êng zawngin thlir rawh

Mithiamte'n an zirchianna a lan danin mi hlim thei leh a êng zawnga thil thlir thiam te'n stroke (thluaka thisen zam chat/block) an nei tlem bik tlat.

University of Michigan-a mithiamte'n hemi chungchang hi an zir a, an hotupa Eric Kim chuan, "A êng zawnga thil thlir \hin chuan a hmalam hunah beiseina neiin, an hriselna pawh an vawng uluk bik a ni," a ti.

He zirchianna hi a êng zawnga khawvel thlir leh stroke inkaihhnawih dan chungchanga zirchianna hmasa ber a ni.

Mithiamte chuan Health and Retirement Study a\angin stroke nei tawh in-report leh psychological data te an lakhawm a, kum hnih chhung an zir hnu-ah thutlukna hi an siam ta a ni.
Optimism (a êng zawnga thil thlir) leh stroke inkaihhnawih theih dan ni-a an sawi erawh a kual ve ang reng viau a, a êng zawnga thil thlir \hinte chuan vitamin ei leh taksa sawizawi te an peih zawk a, ei leh in lamah pawh an insum thei zawk niin an sawi.

He zirchianna chungchang hi Stroke: Journal of the American Heart Association-ah tihchhuah a ni.

Libya ram hel pawlte’n Col. Muammar Gaddafi tawmkuk leh a hmunpui ber, Tripoli khawpui an luchilh hnu pawhin amah ber hi a awmna chin hriat a la nih lo. A birukna a\anga aw rawn chhuahin, Nilaini (Aug. 24, 2011) khan Al-Ouraba TV kaltlangin Libya khawpui ber mipuite chu zawngho lak a\anga an khua chhanchhuak turin a rawn fuih leh a; a awphawi erawh a hma anga phunglung a ni tawh lo thung.

Kum 42 dawn lai Libya ram lo hruai tawhtu, Col. Muammar Gaddafi laka helte hi Pathianni liamta (Aug. 21, 2011) zan khan Libya ram khawpui Tripoli hi an lut \an a. He khawpui hi harsa taka lak a ngaih an rin laiin, hel pawlte hian lo bei lettu an hmachhawn tlem hle a; Gaddafi tana nunna chan ngam an awm mang ta lo emaw tih mai tur a ni.

Pathianni zan dar 11:30 vela hel pawlte Tripoli laili an luh lai hian mipui tam takin an lo lawm a. Helte chu pick-up truck \hahnem taka rawn inzuiin, hlim taka au chungin an silai van vawrh zawngin an kap a; a pawr zual \henkhat chu, Lukir, lo inring rawh, kan rawn \ham chhuak dawn che,” tiin an au chel chul bawk niin an sawi.

OPERATION MERMAID DAWN: Libya rama inbeihna chungchang ngaihsak vak lo tan chuan? hel pawlte hian an beisei loh takin hnehna hi an chang ta thut emaw tih mai tur a nih laiin, awmze nei taka ralrel chunga Tripoli beihpui hi thlak a ni.

He beihpui, Operation Mermaid Dawn hi Aug. 20, 2011 (Inrinni) a\anga \an tura ruahmanna siam a ni a. Hemi hma hian hel pawlte hian Tripoli khawpui hi khawthlang, chhak leh chhim lamah an hual vek tawh a; Gaddafi hian he khawpui chhunga a \huihruaite bawk innghahna a nei tawh lo tih theih a ni a. Hemi hma bawk hian Mediterranean tuipui kama awm, Tripoli-ah hian lawng hmangin hel pawlte hian ralthuam \hahnem tak an lo chaw lut hmasa tawh bawk.

Tum lawk angin Aug. 20 zan hian Tripoli khawpui chhunga awm, hel pawl thlawptu tam takte chuan an ralthuam dawn thar hmangin Gaddafi pawlte chu an bei \an ta a. Hetianga khawpui chhunga harsatna siamtute hi sorkar sipai lam chuan bei let vatin, inbeihna nasa tak a thleng a. Tripoli-a cheng mipui tam tak, ralthuam nei ve lem lote pawh chuan khawpui chhunga hel pawlte chu puiin, veng hrang hranga kawngpui-ah te chuan Gaddafi sipai-te kal tlang theih loh turin tyre, lung leh thil chi hrang hrang an lo tiang khawm hner hnur bawk a. Veng \henkhata sorkar sipai leh helte nasa taka an inbeih hnu hian helte chuan Tripoli International Airport leh ralthuam dahkhawmna hmunpui an la thei niin an sawi.

A tuk (Aug. 21) khua a lo var chuan Tripoli khawthlang lama awm, Az Zawiyah khawpui a\angin hel pawlte chuan Tripoli lam panin beipui an rawn thlak \an ta bawk a. Tripoli khawpui thlen hmaa khua-te chu awlsam taka la zelin, Tripoli pawh an hnaih nghal ruak ruak a ni. Tlai dar 7:20 velah Tripoli dai an thleng hman tawh a ni.

Hetih lai vek hian tuipui lam a\angin, lawng hmangin hel pawl \hahnem tak chuan hmar lama a\angin Tripoli khawpui chu an rawn luchilh bawk a; khawpui chhunga hel pawl awm mekte chu an rawn pui zui nghal niin an sawi.

Kil tin a\anga beihna an tawh avang hian Gaddafi lam \ang sipaite hi hmun tinah nawr beh tawlh tawlh an ni a; Aug. 22 (Tawh\anni) khan Tripoli khawpui 80% vel chu hel pawl kutah a awm tawh niin sawi a ni.

Aug. 23, 2011 (Thawhlehni) khan Col. Muammar Gaddafi hmunpui, Bab al-Azizia hmun hmu hel pawlte hian an bei \an a; nilenga an inbeih hnu, tlai lamah chuan Gaddafi \anhmun tawpkhawk hi helpawlte hian an la thei ta niin sawi a ni.
Hemi hnu hian Tripoli khawpui hmun hrang hranga Gaddafi lam\ang ruh zual an chambangte nena inbeih a la thleng zel a ni.

GADDAFI LEH A CHHUNGKUA : Hemi thu ziah lai thleng hian Muammar Gaddafi bikbo-na chin hi hriat theih a la ni lo va; tun thleng hian a awmna chin hriat a la ni lo chungin a \huihruaite fuihna thu la chham chhuak tur erawh chuan a dam dam ngei tih erawh a chiang a ni.
Gaddafi fapa pathum, Al-Saadi al-Gaddafi, Khamis Gaddafi leh Abdullah Senussi-te pawh an dinhmun chiah hriat chian an la ni lo bawk a. A fapa zinga hriat hlawh ber, Al-Saadi al-Gaddafi hian Thawhlehni khan journalist-te hmaah thu sawiin, a pa chu Tripoli khawpui chhungah a la awm ngei a ni tih a sawi a; an pathum hian an thih thu hriat a la ni lo.

Kolkata-ah Messi

September ni 2 hian Kolkata khawpuiah Argentina leh Venezuela an inkhel dawn. He inkhel hi FIFA-in football tihlarnana a ruahmanna a ni a, Messi pawh a inlan dawn.
Kolkata-a an inkhelh hnu hian Argentina team hian Bangladesh an pan leh ang a, Nigeria nen an inkhel ve leh thung dawn a ni.
Argentina tem hi a \ha thei ang ber lo kal tura beisei an ni a, 'Argentina Football Association chuan national squad \ha ber an tirh tur thu an sawi chiang a. Player lokal tur zingah hian Messi leh Carlos Tevez te pawh an tel a ni' tiin Celebrity Management Group hotu Bhaskar Goswami chuan a sawi.
"Contract kan ziak a, kan contract ziahah hian an lo kal ngei tur thu tihchian a ni," a ti.
Argentina squad hian August ni 30 hian Kolkata an lut dawn a, charity programme leh naupang te tan football clinic velah hun an hmang ang a, India ramah hian ni 4 an cham dawn a ni.

Kolkata a\ang hian Dhaka an pan leh ang a, Nigeria nen September 6 hian friendly match an khel leh dawn a ni.

India ramah hian tunhma chuan football hian hmun a luah hle \hin a, kum 1950 leh 1960 khan Asian Games-ah Gold medal an lo la tawh a, mahse, cricket in hmun a luahlanta a ni.
India ram hi khawvel huapa ram lian ber pawl a ni a, marketing zawnga ngaihtuah pawhin hmun \ha leh duhawm a nih avangin Football chawisan leh tihlar tum chu nasa taka buaipui mek a ni.

A hma pawhin Bayern Munich pawhin India ram hi an tlawh tawh a, Blackburn Rovers pawhin tlawh tura ruahmanna an neih laiin an \hulh leh a. Khawchhak ram lama nasa taka premier league pawhin ram lak an tum laiin India rama ram lak hi an tum zual zel dawn nia ngaih a ni bawk.

English Premiere League an |an ta

Manchester United
chuan a vawi 20-na atan premier league nomawi lak leh an tum a, Community Shield-ah Manchester City an hneh bakah premier league match hnih an khelh chinah an che turu hle.
Pawisa ui hauh lova seng Man City hian 2011 FA Cup an la a, an \henawm Old Trafford-a nomawi lut reng \hin hi an dang thei ang em? A nih leh Chelsea boss naupang leh dahsan tak Andrea Villas-Boas hian Stamford Bridge-ah nomawi a luhpui thei ang em?
Kenny Dalgish chuan Liverpool manager January thlaa a zawm a\angin player lei nan pound million 100 a seng tawh. Chung pawisa zozai chuan Champions Leaque a thlenpui zo ang em?
kai thar - Queen's Park Rangers, Norwich City leh Swansea te hi premier league-ah an inham tang thei ang em? BBC ngaihdan i'n thlirho teh ang.
ARSENAL
Arsenal Gunner manager a nih hnua sawisel a hlawh ber lai hmachhawn mektu Arsene Wenger hian tTrophy la lovin season 6 a hmang ta.
Samir Nasri leh Cesc Fabregas te'n an chhuahsan a, Gervinho leh Alex Oxlade-Chamberlain te an lut thung. Gunner supporter te lunpgawi lohna ber chu 'naktuk' tih fo a ni. Chumi awmzia ber chu heng player naupang rual ho hi nakinah an \ha dawn tihna a nia.
Defence lamah an nawi a, player huhang nei leh game thlak danglam thei an awm lo tih chu critics ho ngaihdan a ni.
Rin dan: 5-na

ASTON VILLA
Aston Villa manager Alex McLeish hi tun season tira manager zinga boruak nei ber a ni mai thei. Birmingham City chu division hniamah a tlakthlakpui a, Aston Villa-ah a insawn a nih kha.
Villa player chhuanvawr Ashley Young chuan Manchester United a pansan a, Stewart Downing pawhin Liverpool a zawmsan bawk. Mahse, player pawimawh tia sawi Charles N'Zogbia chu Wigan a\angin a la lut thung a, Brad Friedel a chan bawk a, mahse, a aiawh turin Shay Given a la lut thung.
Villa hi Darrent Bent lakah an innghat nasa dawn hle a, prmomising player Marc Albrighton an nei bawk a, che chhe lutuk tur chu an ni lo.
Rin dan: 8-na

Blackburn Rovers
Season hmasa khan a tawp lamah che \hain an him chang chang a, Sam Allardyce an ban thut kha an tuar hle a, mahse, Steve Kean a pawh a che chhe lem lo.
An player pawimawh Phil Jones chu Manchester United-in an lei a, Dundee United a\angin David Goodwillie an la lut a, Serb Radosav Petrovic lakah beiseina an nei sang hle.
Defensive giant Chris Samba erawh an la hum thei a, experience player an neih \hatho Ryan Nelsen, David Dunn leh Brett Emerton bakah keeper Paul Robinson te chu an pawimawh viau ang.
Rin dan: 18-na

BOLTON WANDERER
Manager \ha Owen Coyle an nei a, nikum khan season tir lamah an che \ha hle a, mahse, a tawp an kharna lamah an che zuih deuh. FA Cup-ah Stoke 5-0 in an hneh lo a, an game hnuhnung pasarih laiah hneh an ni bawk a, 14 na an ni pha \awk a nih kha.
Nikuma an goal thun thei Chelsea a\anga an hawh Daniel Sturidge chuan a chhuahsan ta a, an top scorer Johan Elmander chuan Galatasaray a chhuahsan bawk.
Tyrone Mears an lalut a, mahse, player talented deuh mai South Korean Lee Chung-Yong erawhin a ke a titliak hlauh.
Gary Cahill chu Arsenal pan tura sawi a ni reng bawk a. Mahse, Bolton hian Kevin Davies an nei tlat a, he pa hi player rintlak lutuk a ni a. Villa a\angin Nigel Reo-Coker an lalut bawk a, Chris Eagle an lalut bawk.
Rin dan: 12-na

CHELSEA
Season thar a ni a, manager thar hnuaiah an khel a. Roman Abramovich chuan kum 33 chauhva upa Andre Villas-Boas chu Porto a chet\hat em vangin a lalut a.
Luka Modric chu lakluh tumin an hel reng a, Fernando Torres leh Didier Drogba te a inkawp fuhtir thei tawh ang? LIverpool a miropui a nih angin Chelsea-ah Torres a che thei lo.
Villas-Boas hian Abramovich duh ber Champions leaque nomawi lak chu a tihtur pui ber nia ngaih a ni a, mahse, player upat lampan Frank Lampard leh John Terry teah an innghat leh lutuk ang em.
Midfield player \ha em em la naupang si Josh McEachran an nei a, Daniel Sturidge a awm bawk a, chumai a ni lo Romelu Lukaku chu Anderlech a\angin an lei thar bawk.
Rin dan: 3-na

EVERTON
Transfer money nei ve ngai lo tia sawi \hin a ni a, David Moyes chu manager dahsan ber pawl a ni. Season hmasa khan dinhmun zahawm tak 7 na an hauh pha. Season kal ta khan Goodison Park-ah Liverpool, Spurs, Manchester City leh Chelsea te chu an tlawm vek.
A pawimawh lai ber chu transfer fund nei thei si lo hian engtia rei nge an kal ang? Manager \ha tak nei mah se player \ha leinan sum a mamawh a ni, chutiang a nih loh chuan top four dinhmun luah ngaihna a awm lo.
An defender chhuanvawr Phil Jagieka chu Arsenal in lei an tum reng a, youngster Jack Rodwell chu player duhawm ber pawl a ni chhova. Hei mai hi a ni lo, teenager Ross Barkley chu player duhawm tak a ni mek bawk.
Rin dan: 7-na

FULHAM
Nikuma an manager Mark Hughes chuan dinhmun \ha takah hlangkai mah se a chhuahsan a, mahse, manager \ha Martin Jol an la lut thei hlauh.
Tottenham manager nireng tawh Jol hi a chhe lo a, kuminah pawh an che chhe lutuk lo tura ngaih a ni. Chutih rualin an innghahna chu Brede hegeland leh Danny Murphy an la ni lo thei lo.
Fulham hi an chet chhiat a rinawm lem lo a, mahse, Europa khel tur an ni a, hei hian EPL-a an dinhmun a siam chhe thei deuh ang em, tih mai a ni.
Rin dan: 11-na

LIVERPOOL
Kenny Dalgish manager atan an la thar a, Jordan Henderson, Charlie Adam, Stewart Downing, Andy Carroll leh Luis Suarez te man chu pound million 100 chuang a ni.
Dalgish chu Liverpool siamthar leh thei tura an ngaih a ni a, player leithar an neih zingah Suarez chu fakhlawh berte zinga mi a ni,
An player lak tharte hi \ha tak tak vek an ni a, attacking lamah option an ngah ta deuh bawk. Steven Gerrard an la nei cheu a, Carragher lah a la tar lo.
Liverpool neitu John W. Henry chuan top four dinhmuna inhlankai ngei ngei a duh a, Dalgish hian a hlangkai thei ngei tura rin a ni bawk.
Liverpool hi an hlauhawm thei viau a, chutiang a nih chuan Arsenal leh Spurs te nen palina dinhmun an inchuh viau dawn niin a lang.
Rin dan: 4-na

MANCHESTER CITY
FA Cup an la a, kum 35 chhung trophy la lova an awm chu thaireh a ni ta. Champions leaque an khel dawn bawk. Carlos Tevez chungchanga buaina neuh neuh a awm tih mai loh chu thawm duhawm lo an nei lo tiin a sawi theih ang.
Sergio Aguero an lei a, a chhe lo tih hriatsa a ni. Aguero a che \ha nghal a, Boss Roberto Mancini chuan Arsenal a\angin Samir Nasri a lalut leh bawk a, player zawnga teh chuan he City hi an turu khawp mai.
Player \ha chungchuang David Silva an nei bawk a, khawi department-ah mah chhiatna tak tak an nei lo tih mai tur khawpin an player te hi an \ha a ni.
Rin dan: 2-na

MANCHESTER UNITED
Manchester United chu champion ngun ber niin \um 19 an champion ta. Kumina an champion leh ngat chuan \um 20-na a ni mai dawn a, record an siam belh zel dawn tihna a ni.
Edwin van der sar a chawl ta a, Gary Neville pawhin a boot a khai ta a, Paul Scholes a chawl ta bawk. Mahse, tichung chuan team ropui an nihna chu laksak theih a ni chuang lo.
David De Gea chu lak thar a ni a, ani bakah Phil Jones leh Ashley Young te lakthar an ni bawk. Chumai a ni lo, Wayne Rooney a awm a, Javier Hernandez a awm bawk a, Nani lakah a game a puitling tial tial bawk.
Sir Alex chuan Tom Cleverley leh Danny Welbeck a kokir a, duhthusamin an che \ha nghal zui.
Tun hnaiah Tottenham chu Man Utd naupang rualin 3-0 in an sawp leh zui a, hei hian United siamthar rual ho turu zia a pholang nghal.
Rin dan: 1-na

NEWCASTLE UNITED
Andy Carrol an hralh a, Kevin Nolan pawhin West Ham a zawmsan bawk. Mahse, manager Alan Pardew hi mifing a ni a, Demba Ba la lutin ani hi game tidanglam the khaw a ni thung.
Cheik Tiote an nei a, Hatem Ben-Arfa leh Sylvain Marveaux an nei bawk. Joey Barton pawhin club dang a la zawmsan chuang lo.
Gabriel Obertan chu Man Utd a\angin an lei a, che \ha lutuk tura beisei tur anni lova, mahse, relegate em tura ngaih chi erawh an ni lo.
Rin dan: 15-na

NORWICH CITY
Manager Paul Lambert hi Norwich City ho idol a ni a, Norfolk club hi premier league-a a champ pui theih phawt chuan a dinhmun chu sawhsawn theih loh khawp a ni tawh mai thei.
Norwich innghahna tur chu Grant Holt leh Wes Hoolahan an ni a, Everton leh Millwall a\angin James Vaughan leh Steve Morison an lalut bawk a. Spurs defender Hyle Naughton chu loan-in an lalut bawk.
Rin dan: 17-na

QUEENS PARK RANGERS
QPR hian manager Neil Warnock an nei. Ani hi team promotion lamah chuan mikhual lo berte zinga mi a ni.
Player \ha deuh mai Adel Taraabt an nei a, Loftus Road hming timawitu a ni. PSG lama kal tura tlangthang hman a ni a, mahse, QPR-ah a cham rih dawn niin a lang a, hei hi QPR tan chuan chanchin mawi a ni.
Striker hlauhawm tak pahnih DJ Campbel leh Jay Bothroyd an nei a, West Ham a\angin Kieron Dyer a la lut bawk a. Club fund ngah lo tak an nih avangin an inham tan theih erawh beiseiawm a ni.
Rin dan: 16-na

STOKE CITY
Team dangdai tak mai an ni. Season kal ta khan 13-na niin FA Cup final an khel bawk a, an manager Tony Pulis hi a nep lo.
Jermaine Pennant leh Mathew Etherington an nei a, striker pasang Kenwyne jones leh Jon Walter te hi hlauhawm tak ve ve an ni.
Inhliamin a tlakbuak Jonathan Woodgate an nei a, inhliam lova a khel tluan thei a nih chuan Stoke City chuan an \angkaipui ber tur pakhat a ni.
Big match-ah an che \ha thei hle a, an dahhniam theih lohva, tun season-ah pawh an che chhe lo mai thei.
Rin dan: 9-na

SUNDERLAND
Season kalta khan an player pawimawh Darrent Bent chu 24 million pound in Villa-ah loh theih lohvin an hralh a. Kuminah lah a midfield tiphuisuitu ber Jordan Henderson chuan Liverpool a awmsan bawk. Nikum khan 10-na a nihpui thei a, kuminah hian engtak ang maw?
Wes Brown leh John O'Shea chu Man Utd a\angin a lei a, Ipswich Town a\angin striker duhawm Connor Wickham chu 9 million pound-in a lei bawk. Midfield-ah Seb Larsson leh Craig Gardner a nei a, Blackpool a\anga a lei David Vaughan a awm bawk.
Rin dan: 10-na

SWANSEA CITY
Manager Brendan Roger hi management lamah chuan beiseiawm ber pawl nia ngaih a ni. Swansea ho tun dinhmuna hruai thlengtu pawh hi a ni. Jose Mourinho zuitu a ni a, 1983 hnua division sang a thlenpui leh ta a ni.
Watford a\angin 3.5 million pound in Danny Graham an lei a, hei bakah hian Wayne Routledge an nei bawk a, hei bakah hian Leroy Lita chu Middlesborough a\angin pound million 1.7-in an lei bawk.
Swansea hi Wales club zinga premier league khelh hmasa ber an ni.
Rin dan: 19-na

TOTTENHAM HOTSPUR
Season kal ta khan AC Milan leh Inter Milan an hneh a, top four dinhmun thleng thei tura ngaih an nih laiin season tawp lamah an che chhe ta a ni.
Manager ropui Harry Redknapp an nei a, chairman Daniel Levy a phur bawk a, Luka Modric an chelh din theih leh theih loh turin awmzia a nei viau thung ang.
Spurs tan chuan Modric chu player pawimawh ber a ni a, Chelsea lamin lak tumin an hel reng thung. Mahse, Rafael Van Der Vaart an nei thung. Churih rualin Modric cham leh cham lohvin Spurs chet \hat leh \hat loh chu a hril viau ang.
Rin dan: 6th

WEST BROMWICH ALBION
Hawthorns tan chuan Roy Hodgson chu manager duhthusam a ni. Liverpool-in an ban a, Roberto di Matteo thlak turin an lalut nghal a, mahse, an tisual lo.
Ben Fostor a lalut nghal a, Chris Brunt contract thar a ziahpui bawk a, chu mai ni lovin Peter Odemwingie chuan a la cham zel tur thu a tichiang bawk. Reading a\anga a lei Shane Long che vel chu a hmuhnawm hle a, Hawthorns ho attacking tichaktu a ni.
Liverpool-ah che ropui lo mah se West Brom tan erawh mi ropui a tling nghal a, Hodgson hi experience manager a ni a, an che chhe em em lo tawp ang.
Rin dan: 13-na

WIGAN ATHLETIC
Manager Roberto Martinez chuan Aston Villa sawmna a hnawl ngam tlat! Mahse, loh theih lohin a player \ha ber Charles N'Zogbia chu a hralh.
Season kal taa a player pawimawh Tom Cleverley chu Man Utd- in an kokir tawh bawk si. Talented midfielder James McCarthy chu an innghahna pakhat tur a ni a, Hugo Rodallega pawh an player pawimawh tur a ni.
Rin dan: 20-na

WOLVERHAMPTON WANDERERS
Season kal ta khan Stephen Hunt goal vangin an cham thei a, Mick McCarthy hnuaiah dinhmun sang zawk an beisei.
Chairman Steve Morgan chuan McCarthy chu pound million 12 player thar leinan a pe. Jamie O'Hare chu a la nghet a, Birmingham City a\angin Roger Johnson chu 7 million pound a a lei kha a tifuh ang em.
Steven Fletcher a la nei a, Kevin Doyle pawh a la awm a, Hunt leh Matt Jarvis te pawimawhna pawh sawi hmaih chi a ni lo.
Rin dan: 14-na

Kim-i'n khiang a awi ta e

Kim Kardashian leh Kris
Humpries te chu official takin nupa an ni ta!
Kim leh Kris te hian Montecito, California-ah August ni 20 khan an chhungkhat leh \hian hnai mi 440 te hmaah inneih thutiam te an chhan ta a ni.
Inneih thlaklak hi tihchhuah a la ni lo a, mahse, an inchei dan vel erawh media lamin an tarlang thei. Kum 30 mi Kim-i'n Vera Wang gown a ha a, a pasal ni ta Kris-a, kum 26 miin Ermenegildo Zegna kutchhuak peak lapel tuxedo jacket leh tuxedo pant dum te an ha.
Moneitu \hiante pawhin Ermenegildo Zegna kutchhuak suit dum an ha \hap a, mo \hian, Kim-i naute pawhin Vera Wang gown an ha vek bawk a ni awm e.
Inneihnaah hian milar tak tak an tel nual a, chung zingah chuan- Ryan Seacrest, Lindsay Lohan, Dina leh Ali Lohan, Avril Lavigne, Melanie “Mel B” Brown, Venus leh Serena Williams, Kathie Lee Gifford, Cheryl Burke leh Mark Ballas, Babyface, Demi Lovato, designer Vera Wang, Brody Jenner, leh Sugar Ray Leonard te pawh an tel.
He inneihna hi E! channel chuan October ni 9 leh ni 10 hian special part hnihin a tichhuak dawn a 'Kim's Fairytale Wedding: A Kardashian Event' tih a ni ang.
Kim Kardashian leh Kris Humpries, New Jersey Nets star te hi December 2010 khan intawngin, an inkar a kaltluang viau a, dollar maktaduai 2 hman inhualna zungbun pein Kris hian 'Min nei duh ang em?" tia a sawm hnuah tun hi an thleng ta a ni.
Kris Humpries hi feet 6 leh inches 9 zeta sang a ni a, feet 5 leh inches 2.5 a sang Kim Kardashian nen hian insan hleih ve tak chu an ni!

Black Sabbath reunion!

Black Sabbath original
member te chu an tour ho tei leh dawn ta!
An indin a\anga kum 42 hnuah heavy metal legend Black Sabbath chu Ozzy Osbourne hoin an che chhuak leh thei dawn ta.
Ozzy hian Black Sabath original line-up te nen album thar an buaipui mek niin London chhuak chanchinbu The Sun chuan a tarlang a, member te hi kum 60 chunglam \hiau an ni tawh. Album an puitlin hunah tour an tum niin an sawi nghe nghe.
An guitarist Tony Iommi, kum 63, chuan album thar leh tour chungchang hi a sawi chhuat niin The Sun chuan an tarlang a, bassist Geezer Butler, kum 62 leh drummer Bill Ward, kum 63,leh Ozzy, kum 62 te nena an reunion thu hi a sawi chhuak a ni.

Kate Winslet-i'n anti-cosmetic surgery group din

Kate Winslet leh a Hol
lywood \hiante Emma Thompson leh Rachel Weisz te chuan Hollywood-a cosmetic surgery (plastic surgery) an ti nasa lutuk chu \ha an tih loh thu tlangaupuiin, cosmetic surgery duh lo pawl an din.
Winslet chuan engti kawng maha a taksa lan dan tihmawi tuma cosmetic surgery tih a tum loh thu sawiin, a \hiante nen hian group pakhat 'British Anti-Cosmetic Surgery League' an din ta a ni. Winslet chuan, "Cosmetic surgery hi ka chhia leh \ha hriatnain a duh ngang lo, kan pian phung leh nih danah ka lung a awi a, natural beauty hi ka ngaisang a ni," a ti.
Titanic changtunu chuan, "Actress ka ni a, mahse, ka hmai vun chuar tur te pawh mar ka tum lo. Ka lanmawi dan tur ngaihtuaha ka taksa tihdanglam ka tum. Hetiang thil hian \halaite rilru a huaikawi zo tawh. Tunah chuan kum 60 mi pawhin kum 30 mi anga lan kan tum \alh tawh a ni," a ti.

Tunge King of Hip - Hop ?

Kanye West, Eminem,
Lil Wayne leh Jay-Z, tu ber hi nge 'King of Hip-Hop' chu ni ta ang? Mahni tawka \ha bera inngai vek te zinga a \ha ber thlan chu huphurhawm ve tak tur a ni, mahse, khawvela rimawi lam ziahna magazine hriathlawh tak Rolling Stone chuan 'King of Hip-Hop' an thlang ta tlat mai.
Weezy leh Dizzy Drake ten kar tin deuh thaw hla hit an nei thei emaw tih tur a ni a, chutihrualin Jay-Z lah chu sawi loha leng a ni, Kanye West nena a album thar Warch the Throne phei chuan fak a hlawh mawlh mawlh hle.
Rolling Stone chuan kum 2009 leh 2011 inkara an album hralh tam dan te, R&B, hip-hop leh rap chart ranking hrang hrang bakah YouTube video hit, social media, concert a\anga an sum lakluh leh award an dawn te bakah critic lamin an thlir dan te tehna a hmangin 'King of Hip-Hop' atan Mr Marshall Mathers, Eminem ti a kan hriatlar chu an thlang ta tlat mai.
Eminem hian 2009 leh 2011 inkarah album copy maktaduai 7.5 a hralh a, YouTube view pawh vawi tluklehdingawn 1.3 a nei a, social media-ah nise Facebook-ah like-tu maktaduai 44 neiin Twitter follower maktaduai 5 a nei bawk. Rapper dang hian an khang ngang lo a ni.
Rolling Stone chuan, "All-time greatest kan zawng lova, tunlaia lar ber leh ropui ber kan zawng mai a ni," tiin 2009 hnulam chauh tehna atana an hman chhan an sawi a, mahse, 2009 hmalam pawh telh se tu nge Eminem hi an el pha reng reng ang le!
Rolling Stone-in rapper \ha zual mi 20 an tralan zingah Top 10-ah hmeichhe pakhat a lang ve a, chu chu No.6 Nicki Minaj a ni!
n

C Pahlira kha

Mite chuan mi ropui leh chhuanawm niin an hria a, amah ka hmuh dan leh mi hriat dan a inan leh an loh chu thuhran ni se, amah hi ka kawm ve tawh tih sawi ka chak tlat. Chu chu a sulhnu chauh hmuh tur a awm tawh hnua a taksa ka thlah vena ni rawh se.
Tunge ka nih a hre lo a, tlai hnih a titi ngaithlaa a ina kal bak chu hmun danga kan inhmuh pawhin
ka be lem lo. Ka thiam loh liau liau a ni, sawi zui lo ang. Mahse, amah ka hriat reng nana thu tlem tal ziah ve erawh bain ka inhria.
A thih thu ka hriat khan, ka hmuh dan sawi ve dawn ila, 'eng tin nge ka sawi ang?' tih ka ngaihtuahnaah a lo lut a; 'genius' tih tur a nih ka'n ring phawt a. Ka ngaihtuah zui a, "Mi hlawhchham a ni em?" tih a lo lut leh. 'Mi hlawhchham' han ti dawn ila, Zofate'n kan hriatrengna tur chu a sulhnu, a hnathawh chu a ni si.
Keia ngaihah chuan mi hlawhchham tih hian amah a tinep pha lo a, a chhungte leh amah lainattute tan chuan a lawmawm lo mai ang em aw, ka ti deuh. Tichuan, 'dreamer' tih te ka'n tum chhin a; chu pawh chu college ka kal laia college week motto atana "dare to dream" leh "follow your dream" tihte kan hotute'n an hman mawi ka tih em avanga ka ngaihtuah chhuah a ni. Mahse, chutiang \awngkamte pawh chu a hmangtu azirin \awngkam mawi a ni lo ve thei tho awm e. Engpawhnise, mihring - hmathlir thui tak nei chu niin ka hria. Hmathlir chu suangtuahna khawvela innghat ni maiin ka hria a, sapho chuan a taka thleng si lo thil ropui taka suangtuah chungchangah hian "castle in the air" tih \awngkamte pawh an nei ni awm tak a ni.
Pahlira khan hmathlir a nei a, chu a hmathlir tihhlawhtling tur chuan ruahmanna a nei a, tihhlawhtlin tumin a penchhuak bawk. Mi chuan ruahmanna an siam dawnin, tunlai \awng takin research an nei a, data an lakhawm \hin. Pahlira chuan hmathlir a nei a, suangtuahna/dream a nei bawk a, chumi tihhlawhtling tura a 'resource' pui ber chu rilru huaisenna a niin ka hria. A 'resource' leh Mizona chu \hen hran theih niin ka hre lo bawk. Hmathlir, suangtuahna leh huaisennate chu ruahmanna siam tura thiamna a neih chhun nen pawh a khaikhin theih ang. Chu thil pathum hmang chuan Mizoram awm dan tur ruahmanna a siam a, chu ruahmanna chu kum zabi chanve zet a liam hnuah Mizorama khawpui lian deuh leh pawimawh zualte innghahna chu a la ni reng.
Ruahmanna siam dan chu university zawng zawng deuhthaw a\angin a zirchhuah theih a, Pahlira thiamna neihte chu khawi university mahin zirtir chhuah an intiam thei lo a, a 'resource' pawh khawvelin pek ngei a intiam thei lo. Miin eng tin tin emaw experience a\angtea an hmuchhuak a nih ngawt loh chuan. Engpawhnise, thiamna sang zawk, data leh resource \ha zawk nena tunhnua ruahmanna siam lehte aiin Pu C Pahlira ruahmannate chu Mizoram hian a la \angkaipui zawk ti ila duhthawh lutuk kan ni lo ang. Ruahmanna awmze nei siam tur hian university leh khawvelin a pek mai theih loh thil \ul tak a awm tihna pawh a ni mahna.
Aizawl khawpui hi ruahmanna \ha tak awm ni se a hlawk dan tur ka ngaihtuahnaah a awm fo a, kum tin leimin vanga chhiatna thleng a tlem zawk ang tih chu thudik chiang sa a ni. 'Disaster management' lama sorkar senso tlahniam tur chu thuhran ni se, ni thum ni li ruah a sur buan buan chang pawha thlamuang taka awm theihna tur kha a ni hlu ber tur nia lang chu. Chutiang chu ni se kei chuan Aizawl khawpui hi tourist hiptu \ha tak a nih nghal mai ka ring. Mahse, Aizawl khawpui hi 'tourist hiptu' ni se ka tih ngawih ngawih pawh ka hre chuang lo, thil pakhat erawh chu a mi chengte hi tun aiin an hrisel zawk ang, an hmel\hat hlawm hle na a, tun aiin an hmel\hat ka ring tlat bawk. Lirthei a tlo ang a, 'fuel' an hmang tlem ang a, boruak a thianghlim zawk ang. Ke-a kal a hahdam zawk ang a, hmun \henkhatah chuan thirsakawr pawh a hman theih hial ang. Sum leh pai zawng pawhin chu chu thil awmze nei leh hlu tak a nih ka ring. Khawpuia 'public transport' \ha lo hian economy thui tak a nghawngin ka'n hre ve ngawt a!
Heng thilte hi kei chuan 'informal'-a 'information' tam tak ka dawn hnua ka ngaihtuahnaa lo awm a ni a, chuti chung pawhin chance nei ta ila, hma ka la ang em aw? Chu mai a ni lo, ka lo ngaihtuah dante hi thudik niin \an tur ni se ka \an ngamin ka peih tak tak ang em? Chutiang vel chu ka ngaihtuahnaah a la awm tho. Pu Pahlira chuan khawpui \ha tak awhna rilru a nei a, mahse, ka dawn ang information chu a dawng lo. Chuti chung chuan ani chu huai tak leh rilru nghet tak puin a pen chhuak a ni.
Min hrilh dan chuan Aizawl khawpui tana ruahmanna a siam khan mi nuai nga len hal halna tur a ni. Chhim lamah Melriat, hmar lamah Sihphir, chhak lamah Tuirial, thlang lamah Sairang. Inkalpawhna kawng awm dan turte pawh a riruat a, ngaih pawimawh hmasak \ul nia a hriatna laiahte chuan kawngte pawh a zawng. A kawng zawnte chuan a hmathlir hmuhthiampui ve lote zah leh ngaih pawimawh a hlawh lem lo a ni ang, a \hen chu a ping leh a, a \hen tihhlawhtlin lohvin a thamral a, a thei theiin an nek bawk a ni ber. Chuti chung chuan kum 50 zet a liam hnu-ah pawh Aizawl khawpui tan chuan 'nerve' pawimawh ber pakhat a la ni hlawm.
Aizawl khawpuia mi nuai nga vel an khawsak dan tur a mitthla lai a\anga kum 50 zet a liam hnuah pawh Aizawl khawpui chu sawi loh a district pumah mi nuai nga an la awm lo thung. Chu chu thil atthlak mai a ni em? A lo nih chuan C Pahlira hi a lo fing hle ang tih a hlauhawm awm mang e. Mahse, a mitthla ni lo, a taka a thawh chin hian Aizawl khawpui chu a dawl tawh lo a, chu pawh thuneitute zingah C Pahlira hmuh chen hmu an awm loh vang ti ila a sual lo ang. Chuti ni lo se a tira kawngpui zauhna tur feet 15 an ruahmante tal chu a him ang a, Aizawl khawpui hian traffic jam vang harsatna leh buaina a tawh mek hi a tawk kher lo tur.
Suangtuahna leh hmathlir \ha tak awm mah se a tihhlawhtlin chu thil awlai a ni lo. Mi tam tak ang chu ni se Pu Pahlira suangtuahna pawh hmalak ngaihna awm lovin leh engmah chhui tur awm lovin a thamral vek ang. Mizoram inrelbawlna naupang tak chuan record mumal takin a vawng lo a, ani- office hnathawh dan phunga experience chhuan awm tak nei pawh ni bik lo chuan record a nei bik lo.
Mahse, a suangtuahna leh a hnathawh tihhlawh tlinna tur sum sorkar a\angin beisei tur a awm lo tih chuan a tibeidawng ve lo a, kut kuangkuahin a awmtir hek lo.
Ram an sem a, a kawng tur an ruahman bawk a. Chu ram sem feet 100X60 chu kawngin a pawh a ngai a. Ram neitu chuan jeep kal theihin ama kawng tur a sial tur a ni. A ram thleng kawng a sial hnu-ah district council sorkar chuan 'pass' siamsakin a lo pe chauh \hin. Sorkar sum bawm a hranpaa sawk hek lovin kawng engemaw zat chu sial zawh a ni ta hial mai. Mahse, harsatna dang a la awm ta cheu; ruam leh kawrin kalkawng a dangchat a, inkalpawh mumal theih lohna hmun a awm nual. Sorkar a\angin chung ruam leh kawr chunga lei (bridge) dawhna tur sum chu beisei ngaihna a awm si lo. Lei tel lo chuan kalkawng hi kalkawng a tling lo a, chutah pawh thing dawh kai ringawt ni lo, hautak zawka siam te a la ngai leh ta nghal. Kawng siala ram neitute hnenah chuan 'cheng 50 zel rawn thawh rawh ule' an ti ta ringawt mai. Anni pawhin phunnawi lovin an thehkhawm liam liam ve mai bawk. Mahse, sorkar sum bawmah erawh an thehlut phal lo.
"Sorkar sum chu hman leh dawnin dan zawm tur tam tak a lo awm a, a buaithlak," tiin thlirlawktu C Pahlira chuan a sawi. District council-a an head clerk hnenah an pekhawm a, ani'n him takin a lo vawng a, chu chu ruam leh kawra inkalpawhna tur siam nan an hmang ta a ni.
Pu Pahlira'n Aizawl a ruahman lai kha chuan Aizawl chawhmeh zawrhna hmunpui ber ni ta New Market chu 'Sakawrpu Lane' tih a ni a, Assam Rifles sakawrpute an awm \hin. Aizawl khawpui hian chawhmeh zawrhna hmunpui a neih \ulin a hria a; Delhi khuan Aizawla sipai ram zau tak mai chu a ngai pawimawh lua lo niin Pahlira chuan a hre bawk a, Aizawla Assam Rifles commandant a dawr ta a ni:
"Sakawrpu lane hi in sawnchhuak tur a ni. Sipaiah lal ber i ni a, kei civil-ah ka thu ber bawk. Keini pahnih kan inrem chuan a tawk mai," tiin.
Sipai lal pawh chuan a lo 'aw' ve mai bawk. Assam Rifles-te chuan tuna New Market-a an sakawrpuho chu Babaji Veng lamah an sawn thla ta a, sakawr inte chu chawhmeh zawrhna tura chei a lo ni ta a ni. New Market hmun tur pawh tun aia zau fe-a ruahman a ni nain a hnua " mi thiltitheite'n" an hlep tam deuh ni awm tak a ni. Thakthing khamah pawh bazar in ropui tak sak turin ruahmanna siam a ni a, mahse, ruahmanna chu a piangchhuak zo lo, mimal in a ding zawk fur bawk.
Shivaji Tilla leh Khatla kawnte pawh sipai ram vek a ni a, mahse, ziak pawh ni lo \awngkain an va dawr a, sipai chuan civil tan an lo pe ta a ni.
Hetih lai hian Venghnuai field a\anga kawngpui rawn kala, Republic Veng-a rawn phei, Venghlui tan tlanga Babaji Venga kal zel a, Lammual hnuaia kal zel, Modern English School bul kawng kawi lai taka chhuak tur pawh tun thlengin a la tlang lo a; tlak lampang kawngpui, CP Road tia vantlangin a sawi mai, Khatla kawna chhuak tur pawh Assam Rifles lamin an hnawh ping leh tawh bawk.
Aizawl khawpui tan chauh ni lo Lunglei, Champhai, Kolasib, Serchhip leh Vairengte tante pawh C Pahlira chuan ruahmanna a siam a, Lunglei, Kolasib leh Serchhipahte chuan hma pawh a la hman nghe nghe. Mahse, ram buaiin a nang a, zinchhuah a harsat avangin a chhunzawm thei ta lo a ni. A zinchhuah theih loh avangin Aizawl khawpuiah a insawrbing theih phah ta thung.
Pu Pahlira chuan Mizoram mihring zawng zawng khawpui nuam taka cheng vek turin a duh a, a duhthusamah chuan khaw 700 vel chu khaw 10 vela chen khawm hi a ni. Chu erawh chu a beisei ngam bik lo a, khaw 100 vela insawikhawm theih erawh a beisei.
Hengte hi C Pahlira thil tih tlem azawng chu a ni a; ka ngaihtuahnaa awm fo erawh chu engatinge a hun lai khan khati taka 'urbanisation' a lo tuipui tih hi a ni. Sawi awm lo a ni emaw, tunlaia 'urban
history' an tih ang chite hi a zir chu sawi loh a hre hman pawn ka ring lem lo! 'Mizo a dah ropui lutuk hi hetiang ngaihtuahna, suangtuahna leh hmathlir neihtir a, hnathawhtirtu a ni thei ang em aw?' tiin ka ngaihtuah \hin.
A Mizona leh hnam rilru chu midang \awngkam a\angin ka hre \hin. Kei chuan Aizawl khawpui ruahman chungchanga a titi ngaithla turin ka va pan kha a ni a, politics pawh a sawi kai. Mahse, zep nak emaw ngaihthlak chin ka nei alawm. MNF-in Zoram independence an sual laia India hnuaia Mizote awm rih \ha ti zawktu Mizo Union hruaitu, Mizote chu independent awm tak ni mah ila thil harsa a nih dawn avangin India hnuaiah awm rih ila, chuta dinhmun \ha taka awm chu a hahdamin a finthlak a, independence sual chu thil atthlak leh awmze nei lo leh \ul ber a ni lo tih ngaihdan nei ni turah ka lo ngai a ni. Chuvang chuan politics chungchanga a titi chu ka chhinchhiah tlem a, sawichhawn tur pawh ka nei ve meuh lo.
Amah kawm nasate chuan Zohnahthlak insuihkhawm hi a beisei tlat thu an sawi \hin a, a rin loh zawngin politics her mah se a duhthusam her chhuahpui tura hun \ha zawk a lo thlen leh a beisei niin an sawi. Zoram independence hi hmuh phak chak tih an sawi pawh ka hre \hin.
Engpawhnise, a suangtuah leh beisei, tihhlawhtlin tuma hma pawh a lo lak tawh 'urban state Mizoram' chu a la hla viau a, khawpui nuam tak din a tum chu thil ho ang reng tak, 'traffic' vangin a buai ta a ni ber e. Chutiang bawkin 'independent Zoram' leh 're-unified Zohnahthlak' hmel pawh a la lang lo a, India sorkar hausakna inchuhin unau kan inmelh hrek hrek chu a nih hi. Thil pakhat ka la sawi leh hram duh chu- a suangtuahna leh duhna lian tak, tlahniam ve mai mai ngai lo chuan a rinawmna leh dik nia a hriatna a hruaisual mai mai lo ni-a ka rin thu hi a ni.

MIZO LUNGPHUN HLUI TE HI

Tunhnaiah Mizoram
khawchhak lama Vangchhia khaw daia hmanlai lungphun tam tak awmkhawmna ‘Kawtchhuah Ropui’ an tih mai chu Archaeological Survey of India (ASI) te’n hmun pawimawh leh humhalh ngai (Site of National Importance) atan a puang a. A lawmawm hle a ni. Heng bakah hian Mizoram sorkar pawhin 2001 khan ‘The Mizoram Ancient Monuments and Archaeological sites and Remains Act, 2001’ chu a lo pass tawh a, chumi hmang chuan ‘The Mizoram Ancient Monuments and Archaeological Sites and Remains rules, 2003’ chu hman a ni ta. He Rules hmang hian Mizoram chhunga hmanlai thil hlui leh historical places engemaw zat chu humhalh a ni ta a ni.
Tunhnaiah Archaeological Survey of India (ASI) te’n Vangchhia-a lungphun an humhalh tur pawh hi thil lawmawm tak leh Mizo history-a thil thleng pawimawh tak a ni. Vangchhia Lungphun chungchang hi Vanglaini, 13.8.2011-a chhuakah Pu B. Lalthangliana’n bengvarthlak takin a rawn ziak tawh a. Hmanlai Lungphunte hi Mizote kuthnu a nih leh nih lo chungchanga a ngaihdan te a rawn ziak a. Tlema lungphun danglam deuh hlek te chu hnam ang kuthnu nia kan ngai lat \inte chu pawm har a tih thu te pawh a rawn ziak a. Entirnan, East Lungar khaw bula ‘Lungvando’ chu Mizo lungphun pangngai ang a nih loh avanga hnam dang kutchhuak a nih rin tlatna te hi a awm ve bawk a. Chutiang ngaihdan chu Mizote zingah hian tun thlengin a la awm. Tin, Mizo ni lo, hnam dang kutchhuak pawh a ni thei tho bawk.
Lungphun chungchang hi tlem han tarlang ta ila. Lungphun culture (megalithic culture) hi khawvel ram dang chu sawi loh, kan chhehvela hnam dangte – Khasi, Naga etc. te hian an ching hle a, an hnam nunphungah pawimawhna a nei nasa hle a ni. Keini Mizote ai mah hian Khasi-ho chuan an nunphungah awmzia an neihtir nasa a, an uar hle. Hriatrengna lungphun piah lamah an chhungte thi tawh ruh dahna atan te leh thil dang atan an hmang \hin.
Archaeology-ah hian zirna peng hrang hrang zingah megaliths lam hi tunlaia langsar pawl tak a ni a. ‘Megaliths’ tih hi Greek tawng ‘mega’ leh ‘lithos’ atanga lak a ni a. Mega tih chu ‘lian(large)’ tih a ni a, lithos hi ‘lung’ (stone)’tihna a ni. Tichuan, megaliths tih chu lungphun lian sawina a ni a, a huhova lungphun emaw phun tlar tuarh ang hi megaliths tih hian a hawi mah zawk a, a mal din (single upright stone) hi ‘monolith’ ti a sawi a ni thung.
Engpawhnise, Vangchhia leh Lianpui leh hmun danga Mizo lungphun awmte hi a danglamna chu milem inziak te hi a pawngchhuaka ziak an ni hi a ni. Mizo lungphunte hi chi thumin an \hen a, chungte chu- engmah inziak lo (plain monument), a pawnga inziak (engraving of figures in high relief or embossing) leh thuk taka ker (engraving of figures). Heng zingah hian a pawng chhuaka ziak hi a har ber a, a ‘skill’ pawh a sang ber. Mizo lungphun (Megaliths) chungchanga research ti a kan zinkual velnaah pawh hetiang ang lungphuna milem a pawnga inziak hi a tam lo hle a, Zoram hmun hrang hrangah hian chhiar tham lek a awm. Heng lungphun a milem inziak hrang hrangte hian hmanlai kan pipute themthiam zia a tarlang a; tin, kan history chhuina atan thil tangkai tak (archaeological sources) an nih bawk avangin an hlu a, humhalh an ngai em em a ni. Hemi chungchangah hian sawi tur tam tak a awm thei awm e.
Megaliths (lungphun) hi khawvel hmun hrang hrangah hmuh tur a awm a, India hmarchhakah pawh hiana bikin Meghalaya ah hian a tam leh zual. Lungphun te hi chi hrang hrang a awm leh a, chung zinga thenkhatte chu han tarlang leh thuak thuak ila –
a) Menhir – lung phun pangngai/ a tung, hei hi lung mal din a kawk deuh
b) Alignment- hei hi a huho/a intlara lungphun sawina a ni.
c) Stonehenge – a kuala lungphun
d) Dolmen (table stone/stone seats) –a bawk a phun
e) Cairns – lung chhun pawn (stone heaps)
Heng bakah hian phun dan chi hrang hrang a tam hle a, sawi vek sen pawh a ni awm love. Heng zinga Mizorama kan neih te han tarlang ila –
a) Menhir – hei hi chu Mizo lungphun pangngai hi a ni a, a tung chho a phun ho hi a ni. Mizorama lungphun tam ber hi ‘Menhir’ a ni.
b) Alignment – Lung phun tlar hi a ni a. Hmanlaiin pasaltha te hriatrengnan lung an phu tlar thin a, chung chu ‘Hranglungphun’ an ti. Tin Mizoram hmarchhaka Lungphunlian pawh khi a piah deuhah khian a khat tawkin an inphun tlar hlawm bawk a. Hetianga lung phun tlar hi Alignment chu a ni.
c) Dolmen – hei hi a bawk/tlu a phun a ni a, a hnuaiah kamtu a awm thin. Mizoramah chuan Champhai Zote tlanga ‘Sikpui Lung’ ang hi a ni. A phek zawngin leiah an phah a, a hnuaiah lungthu pathum in an kam kang a ni. Hetiang hi khawvel hmun dangah pawh hmuh tur tamtak a awm a, amaherawhchu an phun chhan (ideology) erawh a danglam thung.
d) Cairns (kians ti a lam tur) – hei hi lung chhun pawn a ni a, a chung lamah a zuih ral thin. Mizoramah chuan Mara hnam hovin an lal hriatrengnan a an phun thin ‘Pura’ ang hi a ni awm e. Pyramid ang hian a hnuai lama a arh a, a chung lamah a zuih ral thin a ni.
Hetianga lungphun dan chi hrang hrang a awm avang leh a phun chhan pawh a inan loh nuai avang hian Lungphun hlui te atang hian a phuntute chanchin leh an nunphung, an hnam chin dan te a hriat theih a. Chuvangin lungphun(megaliths) hi history chhuina atana thil tangkai tak a ni reng a ni. Entirnan, Sikpui Lung chu Hmar ho kut pui khat ‘sikpui Roui’an hman laia an phun thin a ni a, a phun dan pawh a awm thlap a ni. Hemi chungchang hi hun remchangah ziah leh kan la tum dawn nia.
Tin, Mizo te khan an lungphun reng rengah milem an ziak nasa hle a, ziah lohna (plain monument) pawh a awm tho bawk a. Heng milem te hi a tlangpuin Sial lu, dar lem, mihring lem, puan, sava, sakawr, silai, fei, sakhi/sazuk leh thil chi hrang hrang te an ziak/ker thin a. Thil mak ve deuh mai chu Zoram khawi hmuna mi pawh hi en ila, milem inziak a awm chuan an ziah dan kalhmang hi a inang vek a ni. Khawchhaka Lianpui leh Vangchhia vela lungphuna mihring lem an ziah dan(style) leh khawtlang Pukzing daia lungphun te, South Sabual kawtchhuaha lungphun a mihring lem inziak te chu a inang vek a ni. Tin, Mizo te thlang tlak dan leh an pem zel dan (routes of migration), an khawsak tawhna (settlement pattern) te kan zir chuan Mizoram khawchhak atang hian khawtlangah an chhuk thla zel tih a lang a. Chuvangin milema thil inziah dan(style) pawh an chhawm thla zel a nih hmel. Tin, khawchhak lama lungphun te hi a tlangpuiin khawtlang lama lungphun te aiin an upa zawk niin a lang, a phuntu ni a an sawi te chanchin enin.
Tin, ‘Pura’ hi Mara hnam chenna velah hmuh tur a awm nual a, Chin Hills-ah Mara ho lo awm tawhna ah te pawh hmuh tur a la awm. Chuvangin ‘Pura’ lung atang ringawt pawh hian Mara hnam ho thlang tlak dan leh an kalkawng(routes of migration) hi a hriat theih ve riai riai a, chutiang zelin Sikpui Lung pawh Hmar ho chanchin chhui nan a tangkai bawk. Hetiang a nih avang hian lungphun hi chanchin hlui(history) chhui nan a tangkai em em a ni.

PHEIKHAWK SIAMTU’N KHAWVEL A NGAM

Kum 1700 chho vel kha chuan England a tlangval tam takte chak ber chu lawng a han zin kual a, hmun hrang hrang tlawh chhuah a ni. Pheikhawk siam pa pakhat rilruah pawh chu chu a lian hle a, hei vang hian geography leh ram danga chengte chanchin a tuipui phah hle a ni. Map-ah ram hrang hrang chanchin leh a mi cheng maksak deuhte chungchang pawh a chhinchhiah thluah nghe nghe a. Savun a siam khawvel lem (globe) a neih phei chu ram dang chanchin sawia an titi changin a leklam zing khawp bawk. Chutia ram hrang hrang chanchin a zir ngun em em lai chuan Jeremy Taylor-a sermon a chhiar fuh ta hlauh mai a. A nun inthlak ta vek a, a tui zawng pawh a dang ta dawrh mai a ni.
Tum khat chu William-a chuan pheikhawk siam zirna a a thawhpui pa hnenah pianthar awmzia a zawt a, ani chuan chumi chhanna hmu tura inkhawm ve turin a lo rawn a. Mahse, thil buaithlak a awm ta tlat mai, inkhawm tura a sawmna kohhran chu pheikhawk siam tlangval tan chuan kal a chakawm lo, a chhan pawh an kohhran pui ber Churh of England atanga inla hrang Kohhran an nih vang a ni. A hnuah pawh William-a chuan a hnial zela, a sawmtu lah chuan "Pawl chhuak niin ngai hlawm mahse, Bible behchhan thoin alawm thu an sawi. Chu chu a pawimawh ber asin!" a ti thin a. Thla engemaw zat chhung chu William Carey chuan chu kohhran sawmna chu a hnar tang tang a. A tawpah chuan a inkhawm ve ta nge nge a, an hrilh ang ngei chuan Bible behchhanin Pathian thu an lo sawi ngei tih a hriat phah ta bawk. A inkhawm ve ta fo mai a, ni khat chu, thusawitu chuan Krista hnung zui dan diklo chungchang sermon a thlak a. William-a chuan a lo ngaithla fuh khawp mai a, chutihlaia a awmdan chu ti hian a sawi a, "Tlachhe ta vek leh tanpuitu nei ta lo niin ka inhria a. Krista hnungzui ka chak ta em em a ni" tiin. Tichuan a ama tana tawp chin thleng tawha inhriain a nun chu Isua hnenah a inpumpek zui ta a ni.
Pheikhawk siam zir a inhlawh chungin tawng hrang hrang a zir tan ta a, nitin fianriala Pathian pawlna hun a hmang ziah a. English, Hebrai, Greek leh Latin tawng a ziak Bible a chhiar thin a. An hotupa thih hnuah a thawhna dawr chu a rochun zui a, nupui a nei ta bawk a. An khua a naupangte luhna zan school-ah lehkha a zir tha leh a. A pianthar atanga kum sarih a vei leh chuan William Carey chu Pastor atan nemngheh a ni ta nghe nghe a ni.
Chumi hnu chawlhkar rei lo teah chuan rawngbawltu rual inhmuhkhawmnaah ti hian a zawt a, "Hnam tin hnena chanchintha hril tura Thupek khan vawiin thleng hian a la huam em?" tiin. Rawngbawltu langsar tak takte chuan, "Pathian hian ringlote ringtua siam a duh a nih phawt chuan nang leh keia puih kher ngai loin Amahin a ti mai ang" tiin an chhang thung. Chu chhanna chuan William Carey-a chu a hmin lo kher mai, chuvangin Pathian remruat leh a kaihhruaina ang zela kal turin a inpuahchah ta a. Kum ruk dawn lai a vei leh a, Carey-a chuan missionary society a din a, a kum lehah chuan amah ngei chu an missionary hmasa berah tangin a chhungte nen India ram an pan ta a. Chutah chuan harsatna a tawk nasa em em a, a nupui chuan rilru lam harsatna a nei a, an awmna hmun a hrisel loh vangin missionary engemaw zat an thi a, rilru hah leh mangang takin a awm fo a ni. Mahse, rim takin a thawk zel a, kum sarih zet a thawh hnuah baptisma chang tur a nei chauh a ni. Heti chung hian a beidawng duh lo a, theihtawp chhuahin a thawk zel a ni. A rawngbawl chhung hian a thawkrim hle a, a tawpah meuh chuan William Carey-a hian India rama tawng lian zual paliin Bible bu pum hi a letling zo a, mission school pawh za sawmhnih paruk lai a din hial a ni.
Pheikhawk siam zira inhlawh chunga khawvel chanchin tuipui em em mai ni thin khan pianthar awmzia a hre ta mai a ni lo, chhandamna hna nasa takin a thawk zui a, 'the father of the modern missionary movement' (Tunlai huna chanchintha hril hna a a sulsutu ber) ti a vuah hial a lo ni thei ta a ni.

LEMZIAK TIHCHHIAT

Tum khat chu lemziak
thiam hmingthang tak mai hian milem a ziak a, a zo dawn hnai tawh a. Chu lemziak chu Princess Diana te inneihna huna pho chhuah tur a ni nghe nghe a.
Lemziaktu chuan a kutchhuak chu mawi a ti em em maiin a thlir vawng vawng a. Lemziak chu metre 2 a hlai metre 8 a sei a ni a, in chung zawlah chuan a hung tha sauh sauh a, uluk takin a thlir a, thlir pah chuan a hnung tawlh hret hret zel a. A lemziak chauh a en avang chuan a hnung lam hawina chang reng reng a hre lo a. Chutia hre lo leh ngaihtuah miah lo a a hnung tawlh zel avang chuan in chung zawl tawpah chuan a tla thla tep tawh mai a. Pen khat lek pawhin hnung tawlh ta sela chuan inchhawng sang tak atang chuan a tla thla tawh ngei ngei dawn a, dam chhuah ngaihna a awm dawn lo hrim hrim bawk.
Chulaia awm ve pakhat chuan lemziaktupa che vel chu a rawn hmu thut a, a dinhmun hlauhawm zia a hmuh chuan han auh mai a tum a. Mahse, a tihamhaih anga, pen khat lek pawh a a hnung tawlh phah vaih chuan a chesual zui ngei ngei dawn si. Tihngaihna dang a hre tawh lo a, hmanhmawh takin rawng leh a hnawihna brush a la lawk a, chu lemziak chu a hnawih ta bawrh bawrh mai a, a tichhe zo ta vek mai a.
Lemziaktupa chuan a kutchhuak chhe ta a hmuh veleh chuan thinrim em em maiin a rawn thawk a, kut rawn thlak a tum a. Mahse, chu lai vela lo awm ve te chuan an lo dawm bet a, a dinna hmun chu an kawh hmuh a. A han enchian chuan a tim sung sung mai a, a dinhmun hlauhawm zia leh chu pain a chhanchhuah dan a han hriat chuan a nunna chhanhimtu chu lawm takin chibai a buk ta a.

(BROKEN PAINTING tih lehlin a ni
- Lalthlamuana Ralte)

Mizoram Annual Plan punna a tlem

Mizoram Annual Plan
punna chu a tlem an tih thu MNF-in an puang a, Congress-in mihring tam zawng a\anga chhut nia sawiin MNF an chhang.
August ni 18-ah khan MNF chuan thuchhuah an siam a, 2011 - 2012 chhunga North East states 8-te Annual Plan peihfel takah Sikkim tih lohah Mizoram chu Plan tlem berah a tang niin an sawi. Mizoram Annual Plan punna 13.33% chu Nagaland leh Tripura tih lohah a punna hniam ber a ni bawk nia sawiin, plan tlem leh a punna percentage a tlem hi mak an tih thu an sawi.
"Central a\anga a thlawna sum hmuh tur Special Programme Assistance (SPA) leh Additional Central Assistance (ACA) sumah pawh a tlem ber dawttua Mizoram, Congress sorkar a \ang hi, an pi leh pute laka an tlaktlum lohzia lannaah kan ngai," an ti. Mizoram sum hmuh tur tlem chhan hi kum kal ta lama cheng vaibelchhe 72 chuang an tih ‘lapse’ vang a nih leh nih loh sorkar an zawt bawk.
"Chief minister Lal Thanhawla'n 2008 MLA inthlan campaign laia, 'Congress a sorkar chuan Prime Minister Manmohan Singh, Sonia Gandhi leh Rahul Gandhi te'n Prime Minister Special Package’ min tiam tawh a ni,' tia a sawi leh; AMC inthlan dawn thlenga PM Special Package a\anga NLUP hmu tur anga an la insawi lai khan, MNF chuan Additional Central Assistance leh CSS a\anga kum tina Mizoram-in sum a hmuh \hin, Plan Fund chhunga mi tho a ni a ti," an ti bawk.
Kumin March thlaa Assembly Session-ah NLUP nodal minister H Liansailova'n NLUP chu PM Special Package atanga hmuh a nih loh thu a puang a ni, an ti a, kum lo kal leh tur atan chuan NLUP atana sum dah hran zat ang tal, Mizoram Annual Plan a pun theih nana theihtawp chhuah turin MNF chuan finance minister thar an ngen.
Mizoram Pradesh Congress Committee (MPCC) chuan state tinte annual plan dawn dan chu a mihring tam dan ang zela chhut a nih thu sawiin MNF te chu awmze nei loa sorkar sawisel chingah a puh.
Thuchhuah siamin MPCC chuan hmarchhak state 8 zingah Sikkim sorkar tih lohah Mizoram chu Annual Plan sum hmu tlem ber a nih thu MNF-in thuchhuah siama sorkar lai party an sawisel chu an chhang a, "Annual Plan hi mihring tam dan ang zelin chhut a ni a. 2001 Census Population based-a chhutin Assam-ah mi nuai 266.56, Tripura-ah nuai 32, Meghalaya-ah nuai 23.19, Manipur-ah nuai 21.67, Nagaland-ah nuai 19.90 an awm laiin Mizoram-ah chuan nuai 8.89 chauh kan awm a, chuvang chuan Annual Plan sum hi kan hmu tam thei lo a ni," an ti.
Hman deuhah pawh MNF hian "hmarchhak state 8 zingah Sikkim sawrkar tih lohah Mizoram-in SSA sum a hmu tlem ber," tia thuchhuah siamin so,kar lai party an sawisel tawh niin MPCC chuan an sawi a, sorkar laipuiin SSA sum a pek dan hi zirlai enrolment tam dan anga pek a ni, tiin, SSA sum min pek dawn khan state dang, zirlai ngahte an pekzat min pe ve thei lo a ni tiin MPCC chuan mipui a lo hrilhfiah tawh a ni, an ti.
Tunah pawh MNF chuan "Annual Plan sum hmu tlem ber,” tiin thu an chhuah leh ta nia sawiin MPCC chuan, "Sorkar laipuiin hmarchhak state 8-te hnenah mihring tam dan anga chhuta sum a pek reng rengin Sikkim-in an chang tlem ber ang a, Mizoram-in kan dawt ziah ang. Chu chu sorkar laipui nawr thiam leh thiam loh vang ni lovin mihring kan tlem vang a ni," an ti.
MNF hian mipui rilru tih chi-ai tumin sawrkar lai party an bei mai mai a ni tih hre turin MPCC chuan mipuite an ngen tih an sawi.

Kum chanve chhungin motor thar 6453Kum chanve chhungin motor thar 6453

Kumin January
a\anga June thleng khan Mizoram-ah motor 'registered' thar, sorkar laipuia Ministry of Road Transport & Highways-in a hriatpui thlap tawh chu 6453 a awm.
Motor thar zingah two wheeler a tam ber a, 4503 a ni. Aizawl district chu motor registered thar tamna ber niin, 4015 ziahluh a ni.
Motor registration tih tharah hian two wheeler motor cycle leh scooter/moped tia dah hi a tam filawr hle a, district tinah a tam ber vek.
Two wheeler dawttu chu LMV (car, jeep, van, gypsy) a ni a, 878 registered thar a ni. Light goods vehicle (407 truck etc.) chu a tam leh deuh niin, thla 6 chhunga registered thar hi 331 a awm. Heavy good vechicle registered thar 137 a awm bawk.
Motor an \henhran danah motor cab/car taxi leh three wheeler te chu a tam leh deuh. Lei laihna atana hman excavator 59 leh JCB 25 a awm bawk.
Aizawl district-ah motor registered thar hi a tam hle. Ministry of Road Transport & Highways-in a hriatpui chinah January-June chhung hian 4015 niin, July telin 4647 a ni. District Transport Office, Aizawl district-in record a neih dan phei chuan kumin Jan-July chhung hian motor registered thar hi 5411 an nei a, tun thla ni 16-19 inkar khan motor registered thar hi 172 a ni.
Aizawl district bikah Jan-July inkarah two wheeler 3463 registered a ni a, LMV 694, heavy goods vehicle 87, light goods vehicle 181 a awm. Excavator hi 46 leh JCB 3 a awm.
January a\anga June inkarah khan enforcement staff lamin dan bawhchhia motor document an hrensak zat chu 813 a ni a, pawisa chawitir 480 niin, an pawisa chawi tlingkhawm hi Rs. 425,300 a ni. He thla 7 chhung hian road tax-ah Rs. 15,050,337 a lut a, passenger & goods tax Rs. 6,176,437 niin, fees Rs. 6,757,738 nen, a vaiin an revenue tlingkhawm hi Rs. 27,984,512 a ni.
Aizawl district tih loh, district danga kumin thla 6 chhunga motor registered dan chu : Lawngtlai-ah 248 niin heng zinga 111 hi two wheeler, LMV 25, heavy goods vehicle (HGV) 38, light goods vehicle (LGV) 20 leh excavator 3 a awm. Kolasib-ah motor 409 registered-ah two wheeler 219, LMV 63, LGV 32, HGV 10, excavator 9 a awm. Mamit-ah motor registered 230 a awm a, 173 hi two wheeler niin LMV 19, LGV 8, excavator 3 a awm. Serchhip-ah motor 305 registered-ah 186 hi two wheeler, LMV 24, LGV 21, JCB 4. Champhai-ah motor 396 ziahluh tharah two wheeler 257, LMV 42, LGV 39, JCB 2 a awm. Lunglei-ah motor 662 registered thar a awm a, two wheeler 478, LMV 66, LGV 24, HGV 11, JCB 6 a awm. Saiha-ah motor registered 188-ah two wheeler 82, LMV 17, JCB 10, excavator 1 a awm.
Heng bak motor class then dangah hian light tractor, motor cab/car taxi, three wheeler (goods/passengers), Maxi Cab, medium goods vehicle, ambulance, recovery van, multi axle goods vehicle, medium bus, mini bus, mobile crane, tanker te a awm bawk.

Pawisaa sumdawngte khuahkhirh dawn

Mizoram-ah
peipun tura pawisaa sumdawn tum te leh, Reserve Bank of India a\anga phalna nei pawh ni se sum puk tira sumdawn tumte tan sorkar phalna lak a ngai tawh dawn. Dan zawm lova tite hrem theih an ni tawh ang.
Tuhnaia Budget Session neih zawh taka member te'n an pawm, dan lova sum khawlna leh a kaihhnawihte khuahkhirhna dan hman tum mek chu August ni 23 khan Secretariat Conference Hall, New Secretariat Complex-ah Mizoram district tina Deputy Commissioner te leh Superintendent of Police ten an zirho.
He workshop-ah hian dan phal lohva sum peipunna chi hrang hrang lo hluar chho zel khuahkhirh a nih theihna tura Mizoram Legislative Assembly-in dan a siamthat - 'The Mizoram Protection of Interest of Depositors (in financial establishment) Amendment Act, 2011' kenkawh a nih theihna tur sawiho a ni. He Amendment Act ang hian mipui hnen a\anga peipun tur pawisa (deposit) laa sumdawngte chuan anmahni bialtu DC te hnenah an sumdawnna an report ngei tur a ni. In-report lote chu pawisa chawi leh jail tan thlenga hrem theih a ni.
Mi hnen a\anga peipun atana pawisa la a, pawisa dahtute hnena pawisa pe kir duh lo emaw thei lo te chu an bungrua leh ro sum mansak theih a ni.
Dan bawhchhiaa mipui hnen a\anga pawisa lakhawm (deposit dawng) te chu, miin complaint an siam kher loh pawhin police te'n an chungah action an la thei dawn a ni.
'The Mizoram Money Lender & Accredited Loan Providers (Regulation) Act, 2010' leh budget session neih zawh taka pass he dan siamthatna Amendment Act kenkawh dan tur pawh ngaihtuahho a ni. He dan hmang hian Registering Authority (DC te) hnen atanga phalna (registration) nei lo tan sum puk tira sumdawnna reng reng chhunzawm phal a ni tawh lo. Mimal emaw company emaw, RBI atanga phalna nei Non Banking Financial Company (NBFC) pawh ni se, Mizoram-ah sum puk tira sumdawn an duh chuan phalna an lak a ngai tawh a ni. Dan bawhchhia te chu hrem theih an ni.
He dan hian a pung (interest) bithliah theih zat te a bituk a, mi harsa te'n sum an puk avanga in leh lo an dahkham te dik lo taka an chan lohna turin ruahmanna te a siam a ni. Sum puktira sumdawngte chu DC/ Registering Authority te khuahkhirhna hnuaiah an awm tawh dawn a ni.
He workshop-ah hian chief secretary Van Hela Pachuau chu khuallian niin, finance secretary Lalmalsawma IAS, chuan a sawihawnna a nei a. Law &Judicial department principal secretary P Chakraborty, finance department addl. secretary Vanlalnghaka leh finance department under secretary Dr PC Lalawmpuia ten zirtirna an pe a ni.

HIV+ve vanga inthup lo Mizo hmeichhia Switzerland-ah lawm a hlawh

Inthup hi a \ul lo, inzep ka
tum lo. Kan nihna kan pawm ngam a ngai a, mahni nihna pawmin midangte tana \angkai kan tum tur a ni ka ti," a ti a, chutiang thu chu Switzerland-ah pawh a sawi. African nu pakhat phei chuan a melh rum phah nghe nghe.
Melh rumtu a tawng a, lawmtu pawh a tawng \euh tho. Kawrchei leh Vakiria hmanga a inchei ni phei chuan thil dang ti hman lo khawpin a thla an la!
December ni 28, 2006-ah daih tawh khan, a fa pahnihna a pai laiin, nau pai dangte ang bawkin a thisen a test a, HIV+ve a ni tih hriatchhuah a ni. Chuta \ang chuan a khawvel a dang ta a, a khawvel tharah chuan Switzerland te hial pawh a tel.
"Ka hmel\hat vang a ni lo, lehkha ka thiam vang pawh a ni lo, positive ka nih vang a ni Switzerland te hial ka hmuh chhan hi," a ti.
Awmkhawloh vang emaw tal duhdah vang emaw he natna hrik hi kai a ni lo a, tihpalh thil thu, vanduai vang liau liau a ni.
"A tirah chuan ka mangang a, sawi ngaihna ka hre lo. Ka \ap tawp," a ti a, "A hrehawm a ni tawp mai. Tumah ka kawm duh lo a, ka chhungte pawh ka hmu duh lo," a ti bawk.
HIV+ve a ni tih hriatchhuah a nih lai hian a \hiannuin a kalpui a, a \hiannu chu amah tih lohva a hre hmasa bertu a ni. A pasal erawhin a pawm thei lo a, "Kei chu ka ni ve lo, rawn haw tawh suh," tih chu a thudawn a ni.
Mangang takin awm mah se a nu leh pa, a chhungte chu a lamah an \ang tlat a, an thinhrik ve lo. Ani pawh a insangmar a, tunah chuan Mizorama HIV+ve te enkawla buaipuitu a ni ta. Switzerland-a a zin hnu-ah phei chuan Mizoram mai ni lovin India ram a vil tawh dawn.
A hming chu Lalchhuanzuali a ni a, Mizorama HIV+ve te inzawmkhawmna- Positive Network of Mizoram-ah councellor a nih bakah women cell bikah president a ni.
July ni 9-17 chhung khan Switzerland-a Zurich khuaah Young Women Christian Association (YWCA) khawmpui lian, kum li dana neih, World Council neih a ni a, HIV +ve hmeichhia tir tura tih an nih angin Mizoram YWCA te'n Chhuanzuali hi an tir a ni.
Ram hrang hrang 100 chuang a\angin an kalkhawm a, positive hi chu 20 vel an ni. "Ka hlawkpui a, hmasawnna tur a tam khawp mai. Mizorama hmeichhe positive-te tan hmasawnna tur a tam a, \hahnemngaih a na khawp mai," Chhuanzuali chuan a ti.
Hmeichhe positive-te hian mahni rama harsatna an tawhte an sawi a, Chhuanzuali chuan Mizoramah nu \ha tak tak, pasalte vanga he natna hrik kai an tam thu a sawi. "Chutiang chu ram dangin an sawi ve lo," a ti. Nimin khan YWCA office-ah thuthar lakhawmtu \henkhatin Chhuanzuali hi an kawm a ni.
"Nu, a \hen chu la naupang takte an ni a, pasalte a\anga kai an tam thu te, inenkawlna lama kan pachhiat thu te ka sawi a, tin, inzirtir a \ulzia te pawh ka sawi. Hmeichhiate hi inchhungkhurah kan buai a, inah kan tawm deuh reng a, zirtirna kan dawng lo. Kan chep a, hun kan nei lo bawk a, enhran kan hlawh a. Chutiang chu ka sawi," Chhuanzuali chuan a ti.
"Ram dang chuan condom chungchang te, nutrition chungchang te an sawi a, a bak chu kan sawi a inang tlangpui a. Inzirtir a \ul thu leh hmeichhiate an chep thu te, enkawlna \ha an mamawh thu te an sawi ve tho a, mahse pasalte vanga harsatna lam hi chu an sawi ve lo, tuman an sawi ve lo," a ti bawk.
Zurich-a a thil zirchhuah sawiin, a him tur zawnga mipat hmeichhiatna hmang (safe sex) tura inzirtir \ul a tih thu a sawi a, "Sex hmang lo tura inzirtir hi a \ha a, mahse a tawk lo. safe sex hmang tura inzirtir a \ul tih hi ka thu hawn a ni," a ti.
"Nu leh pate'n sex hmang lo turin an fate an zirtir a, mahse an fanu kha a lo virgin lo daih tawh thei a. Tin, nupa karah pawh safe sex hi sawi a \ul. Entirnan- nu pakhat chuan a pasal kha a ringhlel a, a pasal chu sex lama tladah tak a ni a. A pasal chuan a hmeichhe kawpte a\angin natna hrik a kai ta a, a nupui chuan a pasal hnen a\angin a kaichhawng ve leh a. Chutiang chu Mizo zingah pawh an tam a, safe sex hmang tura inzirtir hi a \ul a ni," tiin a sawi zawm a ni.
"Mi ramah chuan positive-te hian enkawlna an dawng \ha a, ei leh in pawh a \ha a. Positive-te pawh an hawiharh a. Keini ramah chuan enkawlna dawngte ngei pawh hian mahni damdawi ei hming leh a thawh dan tur pawh kan hre lo. Tin, tuna positive kan hriatte hi a rethei lam, \anpuina mamawh leh chenna tur thlenga mamawh te kan ni a. A hausate chu an inthup tlat a. Rualawh a na duh khawp mai," tiin a rualawh thu a sawi.
Tihpalh thil thua he natna hrik kai, Lalchhuanzuali hian a natna hi a zep lo a, a inthup ngai hek lo. Khawvel ram hrang hrang a\anga kalkhawmte zingah pawh inthup a \ul loh thu a sawi a, inthup \ultitu African nu pakhat phei chuan a melh rum phah nghe nghe.
Khawmpuia tel HIV+ve zingah inthup, mi hriat hlau ngawih ngawih an awm a, mahse Chhuanzuali chuan, "Ram tana thawk tur, midangte \anpuitu tur kan ni a, chuvangin inthup hi \ha ka ti lo. Kan nihna hi i pawm ngam ang u," a ti.
African nu pakhatin chu chu a haw ta a, \awngkam na khel khawla a chhan bakah a dawhkan a chum bur bawk. An hruaitute tih ngaihna hre lovin chawlh rih an rawt hial.
Tlaiah chuan khawvel puma YWCA hruaitute chaw eipui tur a ni a, mahse boruak nuam lo a thlen loh nan Chhuanzuali chu hotel lamah an eitir. Mahse, a hnu-ah Washington DC a\anga kal mithiam pakhatin thu a sawi a, Chhuanzuali ngaihdan chu a \an ta hlauh; "A ngaihdan kha a dik a ni. Mi tan in thawk dawn a nih chuan inzep a \ha lo. Kha nu kha entawn rawh u," tiin.
Global Fund hotute nena hun an hmanho \umin hmeichhe condom chungchang an sawiho a, hmeichhe condom \ha ti zawng ding tura an tih chuan Chhuanzuali chauh a \hu.
"Ka la hmu lo a, hmuh pawh ka la hmuh loh chu eng tin nge \ha ka tih theih ang?" a ti a, chutianga huai taka mahni ngaihdana ding ngam a nih avang chuan an ngaina hle.
Hmeichhe tleirawlte zirtir turin an ti a, fimkhur a \ul thu leh kawppui thlan thiam a \ul thu te a hrilh. "Kawppui thlan dik loh vangin he natna hi a kai theih, fimkhur a \ul a ni," tih chu a sawi dan fo a ni a, Switzerland-ah pawh chu chu a sawi.
Mizo incheiin a inchei \hin a, lawm a hlawh thei hle. Kawrchei, puanchei-a inthuama vakiria a khim \um phei chuan nalh an ti ngang a ni ang, thla an lakpui luih luih a, thusawi pawh ngaithla thei lo khawpin a thla an la.
"Khami ni kha chuan ka rawl vek. Thla min lakpui nasat bakah ka thla an la reng a, engmah ka ti hman lo," a ti.
Kawrchei, puanchei leh vakiria te chu leiah te an dil a, ram dang palaite chuan mawi an ti ngang mai. Mahse, "Ka ta a ni si lo a, ka hawh a nia, ka hralh thei ta lo a," tiin nui chungin a sawi.
"Kan hnam incheina hi a zahpuiawm loh a, khawvel huapa ngaihtuah pawhin a mawi a ni," a ti.
HIV+ve te tan rualawh a nat thu a sawi a, Mizoramah CD4Count pakhat chauh a awm thu sawiin, "Mi ramah chuan an ngah a, Mizoramah chuan mi 3000/4000 velin pakhat kan in\awm a, tlo pawh a tlo lo," a ti a, Zurich-ah pawh a sawichhuah thu a sawi nghe nghe. CD4Count hi HIV positive te enna a ni a, CD4Count hmanga en an nihin, a hniam chuan ART an la \hin a, positive-te enkawl nana thil pawimawh ber pakhat a ni.
Mizoramah enhran an hlawh thu sawiin, positive-te hi an chhungte'n an hnawtchhuak fo tih a sawi a, chutiang mite leh thingtlang a\anga inenkawl tura Aizawl pante tan han riah maina tur (short stay home) an mamawh thu pawh a sawi a, amah \awiawmtu YWCA hruaitute pawhin lo zawmin, sorkar hruaitute hnenah pawh a thuphunga an lo thlen tawh thu an sawi.
Chhuanzuali hi a fa pahnihna a pai laia a inentirna lama inhrechhuak a ni a, vanduai vanga tihpalh thil thua he hrik hi kai a ni. Amah anga harsatna tawkte puiin hun a hmang zui a, YWCA lam nen inchharin Zurich thlengin a kal ta a ni. Zurich-ah hian fak a hlawh hle a, India ram YWCA-ah pawh hruaitu chanvo chelh nghalin, National PIYA Committee of the YWCA of India atan an ruat nghal a ni. India rama hmeichhe positive-te \anpuiin a buaipui \hin ang.
Switzerland pana a zin tur hi a huphurh hle. A zin hmain Shillong-ah Switzerland-a a thusawi turte sawi chhin turin an ko a, chu chu Mizoram pawna a zin vawi khatna a ni. A vawi hnihna tur, chutah pawh mahniin, foreign-ah daih lehnghal, huphurh awm tak pawh a ni e.
"Ka kal tur kha, ka huphurh khawp a. Duhthusamin \awng ka thiam lo a, a hmain Mizoram pawn ka zin ngai bawk si lo. VISA interview ka neih hma zanah phei chuan ka mu thei lo," a ti.
|awng lamah duhthusamin chak lo mah se a zin chhungin harsatna a tawk lo tih a sawi a, "Pathianin min pui a, an \awng hriatthiam loh ka nei lo a, ka duh sawi theih loh ka nei hek lo," a ti.
"YWCA hi belh tlak a ni. Hmeichhiate tana beitu pawl hrang hrang a awm a, hmeichhiate thuamchak an tum vek a, mahse hmeichhe positive-te thuamchak tumtu chu YWCA chauh hi an ni mai thei," tiin amah tirtute a fak.
"Mizorama positive-te hian \anpui kan ngai a, kan harsatna hi mi hian min hriatthiampui se ka duh khawp mai. Vanduai vanga he natna kai hi an tam a, mi langsar leh hausa zingah pawh an tam, an inthup mai mai alawm. Nu- pasalte'n hmeichhe dang an kawp \hin vanga he natna kai ve tate pawh an tam a, mahse thinhrik an hlawh zel si," a ti.

Anna Hazare leh Mizoram

Tunlaia India ram titi
siamtu Anna Hazare hi Mizoramah a awm tawh a, sipaia a \an lai khan Mizoramah a awm \hin. Sikkim, Bhutan, Jammu-Kashmir, Assam,Leh, Ladakh leh Mizoram-ah te sipai a nih lai khan a awm a ni.
A awmna hlui Mizoram-ah thlawptu mi engemaw zat a nei; April ni 8-a chawnghei a \an pawh khan khami ni la la khan amah thlawptute'n Mizoramah thawm an nei ve nghal.
Prism, SOSA leh FOMTU te chuan April ni 8 khan eiruk dona tura dan siamna tur 'Lok Pal Bill' siam\hat a nih theih nana chawnghei Anna Hazare thlawpin FW Savidge Hall-ah hun an hmang a, thusawitute'n Hazare hmalakna ropui an tih thu an sawi rualin Mizoram an vei thu an auchhuahpui hlawm.
Thusawitute chuan Mizorama political party-te chu sorkar loh laia eiruk hua, sorkar hnua haw ta mang lo an ni deuh zel tih te, tun sorkar ngei pawh MLA inthlan dawna an manifesto-ah eiruk veng tur Vigilance Committee din tumtu an nih laiin, tunah chuan an din dawn loh thu sawi leh si, tiin an sawi.
Eiruk donaah awmze nei tham tur chuan \halaite an pawimawh tih an sawi a, chutihlaiin eiruk dona lam hawia inhmuhkhawmnaah \halai an tlem zawk fo chu an vei thu te, chu chuan an rilru a tih beidawn hial \hin thu te an sawi.
Kalkhawmte hin resolution an siam a, "Citizen Fight Against Corruption Campaign leh Jan Lok Pal Bill siamthat anih theih nana Anna Hazare hmalak mekna hi pawl pathum - Peoples Right to Information and Development Implementing Society of Mizoram (PRISM), Society for Social Action (SOSA) leh Federation of Mizoram Trade Union (FOMTU) leh vawiina kalkhawm te hian kan thlawp tlat a ni," an ti.
President, prime Minister, Mizoram chief minister leh governor bakah, chief vigilance officer, Mizoram te hnenah resolution copy leh hmala tura ngenna lehkha pek turin an ti bawk.
August ni 18-ah khan Anna thlawptute'n Aizawlah hmun hnihah hun an hmang leh bawk.
Chawhnu dar 2-ah Press Club-ah corruption do nana Lokpal chak tak ngiattu Anna Hazare leh a thurualpuite thlawptute'n hun an hmang a, a huikhawmtu M Lalmanzuala, chief secretary hlui chuan Hazare te duh danin Lokpal hi din ni se Congress MP 245 vel chu lung inah an lut nghal thei ang, a ti.
MLA hlui, Bualhranga pawhin he hunah hian thu a sawi a, corruption vangin hnam a him lo tih sawiin, "He thil hi nuai bo a nih loh pawhin kan control tal loh chuan ram hmakhua a hrisel lo ang," a ti.
Zoramin zalenna a sual laia MNF defence minister R Zamawia pawhin thu a sawi a, "Kan ram sum leh pai che vel hi mipui tan a ni em? A ni lo chiangbal a ni. Chu chu eng nge a chhan? Corruption vang a ni," a ti.
Tlai dar 3-ah Vanapa Hall kawtah pawl hrang hrang 11 te'n vantlang inkhawm an huaihawt bawk.
"Eiruk thubuai nei te - In hun a tawp ta"... "Kan ram hian eng nge a mamawh? - "Sorkar \ha"... "Eng sorkar nge kan duh? - Corruption do ngam"... "Mipui sum eitute u - Kan ram hmelma in ni"... titein an aurual a, corruption dona thuziak an keng fur bawk. Lokpal din ngiata beitu Anna Hazare thlawpin corruption dotute an kalkhawm a ni.
IAS officer hlui SL Sailova'n corruption dova theihtawp chhuah a \ul thu leh Lokpal awmzia a sawi a, India sorkarin Lokpal din a tum chu "ha nei lo, thuneihna tak tak nei lo" a nih thu leh Anna Hazare leh a thurualpuite duh dan chu an duh dan a nih thu a sawi.
NESO vice chairman Lalmuanpuia Punte-in Arab ram hrang hrang buai chhan thil hrang hrangte chu India ramah a awm ve vek nia sawiin, a chhan ber chu roreltute lal lutuk leh corruption a nih thu a sawi a, chu chu Mizoram leh hmarchhakah a awm ve tih a sawi. "India hnuaia kan awm hnu-ah vaiho ze chhia leh an curruption hrang hrang kan lalut a ni," a ti.
Human rights activist Ruatfela Nu pawhin thu a sawi a, khaw 29-a forest deptt hmalakna an chhui thu leh an sum sen anga tarlan cheng nuai 800-ah cheng nuai 100 bak an hman a rin loh thu a sawi. "Chutiang zat sum tichingpentute chungah sorkarin action a lak ka beisei lo; a lak ngai loh avangin," a ti a, corruption do tura ke pen turin mipui a sawm a, mipuite chu corruption vanga an tawrhna hre turin a chah.
Ngursailova Sailo-in Mizoramah corruption vanga tawrhna a nasat thu leh mipui an harh a \ul thu a sawi a, PRISM president Vanlalruata pawhin corruption do tura mipui sawmin, "Pi pu a\angin hnam rinawm kan ni a. Corruption hi kan mikhual a ni. He kan mikhual, min tibuaitu hi kan umbo thei ang," a ti.
IPS officer hlui, MLA hlui ni bawk, FLR Siama chuan sorkar hruaitute chu corruption a awm thu sawi sawi ringawtah a puh a, "Pu Hawla leh a hote hian 'nang kha' ti mai rawh se," tiin mi-corrupt chu vantlang hmaa sawi sawi ringawt lova siam\hat tum turin a chah.
Thiltithei, dinhmun sanga dingte hlemhletna a huatthlala tih leh party hrang hrang sorkar laiin chutiang chu a awm tih a sawi a, "Tun sorkar ding laiah ngei hian en rawh u," tia mipui sawmin, "Anmahni leh an chhungte an duhsak hmasa phawt ang. Chumi dawtah an party worker, an chhawr \angkaite an duhsak leh ang," a ti a, chumi dawtah chuan dan bawhchhiain an duhsak zawngte an duhsak leh ang tiin a sawi bawk.
A tukah Millenium Centre kawtah pawl hrang hrang 11 te hian hun an hmang leh bawk.
Mizoramah Anna Hazare thlawptu an \hahnem ve hle a, Hazare-a pawlte duh dana Jan Lokpal din duh an \hahnem ve hle. Hmarchhakah phei chuan Mizoram hi Anna thlawptute thawm rinna ber a ni hial mai thei. Anna Hazare leh a pawlte pawhin hei hi an hria a, anmahni thlawptute nen hian telephone hmangin an inbe ve reng a ni.

Anna chu tunge?

Ahming pum Kisant
Bapat Baburao Hazare, 'Anna Hazare' tia hriat lar hi January ni 15, 1940-ah Ahmedadbad bul hnai thinglang khawte tak Bhingar-ah a piang a, an unau hi paruk an ni. A pa hi Ayurbeda Ashram Phramacy-ah 'unskilled labourer' a ni a, a pu hi India sipai a ni a, Bhingar-a awm laiin he khuaah hian Anna hi a piang a ni.
A pu thih hnuah kum 1952 khan a pa chuan a hna bansanin an khua Ralegan Sidhi-ah a let pui a, an chhungkua an harsa hle. Hei vang hian Anna Hazare chu a ni (aunt), Bombay-a awm chuan lehkha zir turin a awmpui a ni.
Chhungkaw harsatna avangin pawl 7 thleng chauh lehkha a zir thei. Dadar-ah chhungkaw chawmnan pangpar zuarin a inhlawh lawp lawp \hin.
1963-ah Sipai-ah lutin, Indian Army zawmin driver a ni a. 1962-a India leh China an indo khan sorkar chuan \halaite chu ram chhannana sipai zawm turin a sawm nasa hle a, chuvang chuan san zawngah tling lo mah se Anna pawh hi sipaiah an la ve hram. Kum 15 chhung sipai-ah hian a \ang.
Beidawnna leh mangannain a hual fo a, mahni intihlum mai te pawh a rilruk rum rum \hin. Dam a thlakhlelh loh thu te pawh lehkha phekah a ziak \hin. Mahse, Swami Vivekananda lehkhabu a chhiar a\angin a zawhna chhanna hrang hrang a hmu ta. Mihring nuna pawimawh ber chu mahni mihringpuite tana thawh a ni a, mihringpuite \hatna tura thawh chu Pathian hnena \awng\ai nen thil thuhmun a ni tih hmuin chulam hawi chuan ke a pen ta a ni.
1965-a Pakistan leh India indo \um khan Pakistan chuan thlawhna hmangin Hazare te awmna a bei a, amah chauh a damchhuak chu mak a tiin khawvelah tih tur pawimawh neiah a inngaih phah a, chu chu vawiin thlenga amah turtu pawimawh a ni. Chutihlai chuan kum 26 mi chauh a la ni a, eitur ngaihtuah ringawt hringnun hman zawh chu a tum ta lo. Chu chu nupui a neih loh phah nia sawi a ni nghe nghe.
Sipai a\anga a pension hnu-ah Ralegan Sidhi-ah a inbengbel ta a ni.
Ralegan Sidhi khua hi khawkhengin a tibuai fo a, ruah a sur khat hle. A khaw mihring 80% vel chu ei leh bar zawngin khaw dangah an kal \hin a, hnathawh tur zawngin darkar 6 vel te kea an kal a ngai \hin.
Anna Hazare chuan Ralegan Sidhi mipuite harsatna chu hriain theihtawp chhuahin hma a la ta a, tuizem te siamin tui an neih theih dan tur a ngaihtuah ta a ni. A hlawhtling hle a, World Bank meuh pawhin chu khua chu model village-ah a puang ta hial.
1991 vel a\ang khan eiruknain hmasawnna a tih\huanawpzia chu hriain Bhrashtachar Virodhi Jan Aandolan (BVJA) tia hriat lar pubilc movement against corruption a tuipui hle. Forest officer 42 laiin dik lo taka thil tiin pawisa tam tham tak an tichingpen nia sawi a ni a, sorkar-ah an thlen a, mahse, minister pakhat a inrawlh ve avangin sorkarin eng vak a ti zui lo.
Hei hi duh lovin Hazare chuan Padmashree Award, president of India-in a pek leh Vriksha Mitra Award, khath laia Prime minister Rajiv Gandhi-a'n a pek chu a pe let leh a ni.
Hazare chu a tlawm duh lo a, chawnhgeiin a nawr zui. A tawpah chuan sorkar zawk chu tlawmin officer hlemhlete chu na taka hrem an ni a, minister 6 an ban phah bawk a, kha thil vang khan officer 400 vel chu siksawi an ni bawk.

Jan Lokpal chu

Havilder bang, Laldenga'n ram ropui inti India a chawhbuai a\anga kum 45-naah sorkar ropui inti India sorkar chu Havilder bang bawk Anna Hazare-a'n a chawkbuai a, chu buaina chuan India ram a pel nghe nghe.
Havildar bang Anna-a'n India sorkar a chawhbuai chhan chu corruption dotu tur Lokpal ruangam leh a kalphung tur chungchangah Anna te pawl leh sorkar lam ngaihdan a inan loh vang a ni.
Corruption do nana Lokpal din ngiattu Anna Hazare hi August ni 16 tuk khan police te'n an man a, India ram titi a tling nghal.
Kum 74-mi Hazare hian Lokpal ngiat nan Delhi-a JP Park-ah chawnghei a tum a, a thurualpui Prashant Bhusan chenna in a\anga JP Park pan tura an chhuah dawn lai velin police 22 velin kalchilhin an man ta a ni.
Hazare hi police te hian Innova car-in Delhi Police Mess an panpui nghal a, chumi hnuah special executive magistrate hmaah an hruai.
Hazare chungchang hian titi a luah nghal a, parliament-ah pawh an bengchhenpui nghal. Home minister P Chidambaram-a'n thil awmzia sawifiah a tum pawhin eptu pawl lamin an lo au bengchheng a, chuti chungin home minister chuan hreh tak chungin Hazare hi an man niin a sawi.
CrPC Section 151-na hmangin Hazare leh a thurualpui mi paruk an man a, mi 1000 chuang daih hreng bawk tiin home minister chuan a sawi.
Mi corrupt-te chhuia hrem theitu tur Lokpal din ngiatin Hazare hian April thla khan chaw a lo nghei tawh a, sorkarin a duangtu tur dinin Hazare leh a thurualpuite pawh member atan an ruat a, mahse an thu a rual theih loh avangin Hazare chuan August ni 16 a\anga chawnghei a tum leh ta a ni.
Hazare leh a thurualpuite'n Lokpal hi prime minister pawh huam tura an duh laiin sorkar lamin chu chu an remti lo a, hei hi an thu inhmuh lohna ber pakhat a ni. Hazare leh a thurualpuite chuan sorkarin din a tum Lokpal chu engmah tak tak ti thei lo tur, a hming maia awm ve mai mai turah ngaiin ni 16 a\anga tiamchin awm lova chawnghei hi an tum a, thlawptu mipui an ngah hle.
India ram hmun hrang hrangah Hazare \antu mipui an che ve nghal a, Hazare te khua, Maharashtra-a Relegan Siddhi-ah pawh mipuiin lirthei tlan lai dangin lungawi lohna an lantir a, sikul naupang pawh an tam hle.
Hazare chuan mipuite thu chahin Lokpal din ngiata beihna chu zalenna atana beih vawi hnihna tiin a sawi.
"He rama ka chenpui duh takte u, zalenna atana beihna vawi hnihna chu a in\an ta a, kei chu min man ta. Kei min man avang hian he thil hi a tawp ang em? Ni lo e, tawp lul lo ang. Chutiang a nih chu phal suh u," a ti a, "zalenna sual vawi hnihna" chuan India ram hmun hrang hrang a kangkai ta a ni.
Lokpal (Citizen's ombudsman) hi eirukna dona tur a ni a, Scadinavian rama 'Ombudsman' an tih a\anga lak a ni ber. Scandinavian ramah chuan politician leh officer lian eirute hremna \ha tak dan an nei a, chu chu Ombudsman an tih chu a ni. 1966-a Administrative Reforms Commission (ARC) chuan Lokpal ruangam hi siamin Centre-ah Lokpal ni se state-ah Lokayukta ni se tiin an ruahman a ni.
Lokpal tih hi Hindi \awng a ni a, 'Lok' tih chu 'mipui' tihna niin 'Pal' chu 'venghimtu/enkawltu' tihna a ni. Lokpal-in a tum ber chu India rama eirukna tihrem a ni ber mai awm e.
Kum 42 hnuah pawh India huan Jan Lokpal Bill chu a puitlin hlei thei lo. Lok Sabha palina, 1969 khan pass daih tawh a ni a, mahse, Rajya Sabha-ah a tlang lo thung. Chumi hnu-ah 1971, 1977, 1985, 1989, 1996, 1998, 2001, 2005 leh 2008-ahte khan 'introduce' leh a ni chungin pass a ni ngai lo chuang a lo.
Parliament-a 'introduce' a nih a piangin a enchiangtu bik committee tih velte lo zirchian atan dah a ni \hin a, chumi chhung chuan sorkar changtu lam an inthlak hman \hin vangin a puitling ngai lo.
Tun hnaiah Justice Santosh Hegde, Prasant Bhushan leh Arvind Kejriwal te'n an duang leh a, mahse sorkarin din a tum tak tak lo nia hriain Anna Hazare hian April ni 8, 2011-ah chawngheiin sorkar a kar ta a ni.
Ni 4 chhung chaw a nghei hnu-ah sorkarin Lok Pal bill siam\hat an tum thu an tiam tak avangin Anna chuan a chawnghei a titawp ta a, mahse, sorkar chu a kar reng tur thu sawiin LokPal bill hi August ni 15 hmaa pass a nih loh chuan chaw nghei leh a tum thu a sawi.
"Mipui te duh dan hi a thamral ka phal lo. Sorkar hian Lok Sabha neih leh hun monsoon session-ah he bill hi a pass lo a nih chuan national flag pu chungin lungawi lohna ka lantir leh ang," a ti.
Sorkar chuan a duang turin committee a din ta a, Hazare leh activist dang palite leh minister panga an tel. Mahse, an thu a rual ta lo a, minister-te duh dan zawk chu parliament-ah putluh a ni ta a ni.
August ni 4-ah Lokpal Bill chu parliament-ah putluh a ni a, hetih lai hian Lokpal ngiattu langsar Anna Hazare chuan a copy a lo hal.
Kum 74-mi Hazare chuan sorkarin Lokpal din a tum dan chu "hnam phatsatna" tiin a sawi a, sorkar lamin Hazare chet dan chu "Parliament zah lohna" an ti ve thung.
Lokpal hi hlemhletna dona atana tih, chak taka chhuia hrem tura beisei a ni a, a ngiattu Hazare leh tlawmngai pawl \henkhat chuan sorkarin din a tum dan hi an pawm ta lo a ni. Sorkarin Lokpal chu prime minister leh a office huamtir loh an tum chu an pawm loh chhan ber pakhat a ni a, mi hlemhlete chhui turin thuneihna a nei tak tak lo niin an sawi bawk.
Hazare leh a \huihruaite chuan India sorkarin Lokpal din a tum hian thuneihna a nei tak tak dawn lo tiin an pawm loh chhan an sawi.
Lok Sabha-a an sawihonaah BJP lam chuan Lokpal-in Prime Minister's Office a huam loh chhan hi sorkar an zawt a, a hma chawlhkara cabinet meeting-ah prime minister-in Lokpal hi a office huamtir duh loh chhan a nei lo tih a sawi thu sawichhuakin BJP hotu Sushma Swaraj chuan, "Tuman prime minister thu hi an awih nange?" tiin sorkar lam a zawt.
Lokpal-in huam loh bik nei lo se tia ngiattu Hazare leh a pawlte chuan New Delhi-a Jantar Mantar-ah drafting committee te Lokpal Bill buatsaih hi an lo hal a, August ni 16 a\angin chawngheiin sorkar an kar zui ta a ni.
Anna Hazare chuan an chawngheina hmun, Ramlila Maidan-ah amah thlawptute hmaah thu a sawi a, "Revolution meichher hi a nung reng tur a ni," a ti.
Anna leh a \huihruaite hian August ni 19 a\ang khan Ramlila Maidan-ah chawnghei an \an a, a tanna Tihar Jail a\anga chhuakin Anna hian Gandhi-a thlan leh India Gate te a tlawh phawt a, tlai lam dar 2-ah chawngheina hmun hi a thleng a ni. August ni 16 a\ang khan chaw hi a nghei tawh a, Tihar Jail-a an dah lai pawhin a ei lo.
India sorkar chu India awp \hintu British sorkar nen a tehkhin a, "British-ho chu an chhuak tawh a, mahse he ram hi a la zalen lo, tun hi zalenna sual vawi hnihna a ni," a ti. Chu 'revolution' meichher chu a mit ang tih a hlauh thu a sawi a, amah a tel ta lo a nih pawha mit lova chhi zel turin \halaite a chah.
"|halaite chakna hi hnam chakna chu a ni, Hazare tel leh tel loh lam a ni lo. Chu revolution meichher chu a nung reng tur a ni," a ti.
Doctor 36-in kum 74 mi Anna hi an chawngheihna hmunah hian an vil a, an enkawl uluk hle. August ni 23, ni riat chaw a nghei ni-ah a chawngheinaa viltu doctor-te'n Anna hi ngaihtuahawm chu ni lo mah se a chak tawh lo tih an sawi a, hei hian thuneitute a awm hle hletir thei ta lo; prime minister-in a chawnghei titawp turin a ngen.
Prime minister Manmohan Singh chuan Anna hi lehkha thawnin, "I hriselna kan ngaihtuah a ni," a ti a, Lokpal din dan tur chungchanga an duh dan chu parliamentary committee-in Lok Sabha speaker hnenah zirchian an dil tur thu a hrilh bawk.
He committee hi Standing Committee on Law, Justice and Personnel a ni a, sorkarin Lokpal Bill duang tura a tih committee rawtna lo thlifimtu kha an ni. An thlitfim hnu-ah cabinet-ah thlen a ni a, Parliament-ah putluh a ni ta a ni.
Kum 74 lai ni tawh mah se Anna chuan a ni riat ni-ah a la \hat thu a sawi a, "Ka \ha e...ka doctor-te hian ka thih an phal lo ang," a la ti.
Prime minister-in lehkha a thawn hma hian sorkar lam a\angin Anna te duh dan chu bill awm mekah dah belh theih a nih tur thu a ri bawk.
Anna hian \antu a ngah bakah an thawm a ring tial tial a, sorkar lam hi tawlh lo thei lo dinhmunah an dingah ngaih a ni. Sorkar hian a tirah Anna leh a pawlte chakzia an hre pha lo tih chu mi tam tak ngaihdan a ni.

A mak ANNA

IAS officer hlui SL Sailova
chuan India sorkarin Lokpal din a tum chu "ha nei lo, thuneihna tak tak nei lo" a nih thu leh Anna Hazare leh a thurualpuite duh dan chu an duh dan a nih thu a sawi.
M Lalmanzuala, chief secretary hlui chuan Hazare te duh danin Lokpal hi din ni se Congress MP 245 vel chu lung inah an lut nghal thei ang, a ti.
Mipui Pawl hruaitu Manzuala chuan Anna te ngiat Lokpal kalphung tur chu an pawlin corruption do an tum dan nen a inmil niin a sawi a, corruption do turin mipui zirtira kaihharh \ul a tih thu a sawi bawk.
PRISM president Vanlalruata chuan Anna leh a thurualpuite duh dana Jan Lokpal din chu an pawl duh dan a nih thu leh corruption do nan chu chu tih makmawha an ngaih thu a sawi.
"Jan Lokpal hmang hian eirukna chu do a ni dawn a, politician eiru te, bureaucrats eiru te chu dan an ni thei dawn a ni," Anna Hazare chuan a ti a, Kiran Bedi pawhin mipuite chu Cricket World Cup ang bawka Jan Lokpal atchilh tura a duh thu a sawi.
Mahse, Anna leh a pawlte duh dan chu tihpuitlin lohvin a awm leh \hin a, putar kum 74 mi zet ni tawh mah se Anna chuan chaw a nghei a ngai leh tlat. Thuneitute rin phak bakin thlawptu a ngah a, amah thlawptute tam leh tam loh chu thuhran ni se, amah thlawptute'n kil tin kil tangah thawm an nei ringawt pawh hi a mak a ni.
India sorkar chu Lokpal chak tak din duh lovah a ngai a, chu chu na a ti hle. Corruption vanga mipuite tawrhna chu na a ti a, chuvanga che chu niin a insawi. Chu chuan India ram mipuite a chhem alh mek.

Vei ngah lutukin mihring inkungkaihna a tichhia

Vei i ngah lutuk em?
Eng emaw ngaihtuahin i rilru a buai a, chutiangin i kawppui ngaihtuah ta reng rengin i hun i hmang bawk a. Chutiang a nih chuan i kawppui nena in inkar i tichhe thei niin mithiamte'n an sawi a nia.
Case Western Reserve University-a psychology faculty member-te'n hemi chungchang hi an zir a, vei ngah lutuk leh eng emaw vanga rilru hahna ngah lutuk hian kawppui te nena kan inkar, kan inlaichianna a tichhe thei niin an sawi.
Vei leh ngaih\hat lohna leh rilru hahna nei nasa leh nei hma lutuk chu he zirchiannaa an hotu psychologist Amy Przeworski chuan generalised anxiety disorder (GAD) tiin a sawi.
GAD neite chuan an chhungte, an \hiante leh an thawhpui te ngaihtuah an ti na thei lutuk a, mahse, chu chu an tilang thiam leh \hin si lova, chu chuan inlaichinna boruak a tichhe zawk hlauh thei niin an sawi.
He zirchianna chungchang hi Journal of Abnormal Psychology-ah tarlan a ni.

HEALTHY EATING AND DIET-1

Thau hi chakawm viau
mahse nalh lo khawpa thau hi a hlauhawm a. Vawikhat thau vak tawh chuan intih cher leh tum hi thil hautak a ni. Thau inti cher leh te hi chuan theihpatawp an chhuah thin vang a ni a, a tlangpuiin mi cher hi chuan chaw an ei tlem a, an ei dan pawh a danglam bik a ni. Mi cher hi chu chaw ei laiin an titi a tui a, mi thau erawh hi chuan tawng miah lovin an ei char char thei thung a, thil dang an ngaihtuah hman thin lo.
Cher ria thlarh leh hrisel nih i duh chuan a hnuaia thil ei dan tur ang hian han ti chhin teh.
1. Thei ei tam rawh.
2. Chaw i ei apiangin thlai hring hel ei chi ei tel tum rawh.
3. Chawhmeh kan ro ei uar lutuk suh.
4. Nitin tui no riat in tum la, hei hian i kawchhung a tifai anga, i thisen a fai bawk ang. Tui tih hian thingpui, coffee, cold crinks etc. te a huam lo.
5. Chaw nghei mai mai suh. Chaw tak i ei peihlo anih pawhin thei leh taksa tana tha tur thil dang tlem tal ei thin ang che.
6. Chaw i ei hmain thingpui thlum te, chhang thlum te ei suh. I pumpui tan a tha lova, i chauh phah zawk daih thei bawk.
7. I chaw ei hmain aerated drinks - Pepsi, Coke etc. in lo la, a ti puar luah che anga, i taksa tana tha tur i ei na a dal thei a ni. Hengah hian chakna a awm loh avangin taksa tan thatna a nei hranpa lo.
8. I thil ei reng reng thial sawm tha la, i thial sawm that chuan tam lutuk i ei tur a ti ziaawm anga, i pumpuiin a pai tawih sam bawk ang.
9. Chaw i eiin hmanhmawh lutuk suh. I pumpuiin a puar tawh tih thluak hnena hrilh chhawn nan minute 20 chhung hun a duh a ni.
10. Thlai hring hel ei chi ei tam la, i thisen a chak ang.
11. Sangha tin, vawksa tin etc. te hi siam awlsamin tui viau mahse chakna an pai tlem avangin ei tam loh a tha zawk.
12. Masala leh chi ei tam loh a tha.
13. Sa ei tam lutuk suh. Sa i ei pawhin a ti ei tam zawk la, a thau ei nasa suh.
14. Artui hi siam a awlsamin a tui viau a, mahse ei tam lutuk erawh a tha lo tih hriat a tha.
Chaw ei kar lakah hian thil dang hmawmsawm ei hi a chakawm duh viau a, mahse hei hian mi a tih thau duh em avangin tih loh hram hram a tha a ni. Chaw i ei hma si a i ril a tam chuan thauna lampang ei mai lovin thlai a hela ei chi - carrot, fanghma etc. leh thei te ei zawk ang che. Inti cher duh i nih chuan nidanga i duh hun huna i thil ei ang kha i ei thei tawh lo tih hre reng la, tumruhna tak tak nen insum hram hram zawk ang che.
Zingkar chaw ei hmaa thingpui leh chhang ei hi tih than phei chuan a tui duh viau a, mahse chaw ei leh mai si chuan pumpuiin a zo duh lova, thau mi tan chuan thau lehzualna a ni ringawt mai a ni. Cher i duh chuan thingpui leh chhang ei lovin tui in la, hei hian thil dang i ei chakna a tibo anga, i taksa tan pawh a tha zawk dawn a ni.
Kan sawi tawh ang khan thau tawh hnu chuan intih cher leh hi thil awlai a ni lova, taima tak leh tumruh taka insum chunga inenkawl loh chuan a theih loh tluk hial a ni. Mahse duh tak tak tan chuan theih loh thu a awm lova, a chunga kan sawi tak te khi zawm la, cher nalh tak nih i duh chuan bei tak tak teh. Thil reng reng tum tak taka tih chu theih loh mang hi a awm lo ania. I lo cher chuan nangmah pawh i inthazo sawt anga, i nun pawh a hlim sawt ngei bawk ang.

MIZO 5 TELNA INDIA U-16 TEAM CHE THA

India leh Pakistan inkhel chu eng level-ah mah a boruak a hniam thei lo hrim hrim. SAFF Cup (U-16 ) Football Tournament khelh mekah India leh Pakistan te chuan final an khel dawn a, India team-ah hian Mizo 5 an tel.
Ram pahnihte hi Group league-ah an lo inhmachhawn tawh. Pakistan hi 1-0-in an chak a ni. South Asian Football Federation Championship (SAFF Cup) khel turin SSA Mizoram Football Academy a\anga zirchhuak Mizo naupang pangate chu India U-16 team-ah hian an tel a ni.
August ni 1-10 chhunga Nepal khawpui Kathmandu-a khelh mek, SAFF Cup 2011 (U-16)-ah hian ram paruk- Bangladesh, India, Maldives, Pakistan, Sri Lanka leh a thlengtu Nepal te an tel a, SAFF member pahnih Afghanistan leh Bhutan te chuan team an tir thei ta lo a ni.
He tournament hi a vawi khatna a ni a, India hian champion ngei an inbeisei hle. Team parukte hi group pahnihah in\henin point hmu sang pahnihte'n semi final an khel a, India leh Pakistan hian final an lut ta a ni.
India team-a tel Mizo naupangte hi SSA Football Academy atanga inzirchuak te an ni a, a hmain India U-13 team velah pawh an lo tel tawh \hin.
K Lalramzauva, Luangmual leh Daniel Lalhlimpuia, Serchhip te chu SSA hmalaknaa Chandigarh Football Academy-a awm mek te an ni a, Lalrammuana, Ramthar Veng leh Vanlalduatsanga, Mamit te chu AIFF leh IMG Reliance \angkawp huaihawt USA-a thla 9 chhung training nei a kal tawh te kha a ni. Vanlalthlamuana, Ramhlun South chu India aiawhin U-13-ah a fehchhuak tawh a, tunah hian a ute pahnih pawh India U -19 team an khel mek bawk.
India hian match hmasa berah Pakistan an hneh loh hnuah Maldives an hmachhawn leh a, India hi 3-0-in Maldives hi an hneh a. India tan Daniel Lalhlimpuia (Min 31), Raja Rawat (Min 36), Vanlalduatsanga (45+2) te'n goal an thun a ni.
India team hian semi final-ah a thlengtu Nepal chu semi final-ah penalty shootout-ah an hneh a, final-ah an hneh loh hnu Pakistan final an khel dawn ta a ni. He chanchin buatsaih lai hian result kan hre hman ta lo a ni.
Semi final ah India leh Nepal hi 1-1 in an inhnehtawk a, Nepal tana Rishi Thapa goal thun chu hun tawp dawnah substitute Nitin Jyala-a'n a sût a; a khela tha zawk India tan Vanlalduatsanga, Raja Rawat leh Suman Saha-te'n uiawm takin an thelh hlawm a, a tawpah penalty pet a ngai ta a ni.
India tan Vanlalduatsanga, Suman Saha, Myron Mendes leh Harmanjot Singh-te'n an pet goal a, Lalrammuana'n goal bar a pet per a; nimahsela India keeper Supratim Bhattacharya chuan penalty vawi hnih a dang a, India 4-2 in an chak.
India hmachhawn tur Pakistan hi SAFF Cup-ah hian hneh lo nei lo a, final lut an ni. India 1-0-in an hneh a, Maldives 6-0-in an sawp. Chumi hnuah Bangladesh 2-0-in an hneh leh. He tournament-a goal khung hnem ber an ni. An innghahna chu Mansoor Khan leh an winger, Sher Ali te an ni a, tun tournament-a goal khung hnem ber ni mek Muhammad Bilal hi Pakistan tan thlamuanpui tham a ni bawk.
India chhuanvawr leh innghahna chu Mizo naupang Danial Lalhlimpui, K. Lalramzauva leh Vanlalduatsanga te an ni. India goalkeeper Supratim Bhattacharya hi 1980 vela India internatioanl keeper \hin, Asian All Stars team-ah pawh lo tel tawh Atanu Bhattacharya tupa ngei kha a ni.
India coach pawhin Mizo naupang pathumte hi a fak hle a, India team innghahna an nih thu pawh media hmaah a sawichhuak nghe nghe.