Thursday, April 9, 2009

FIGHT INSOMNIA

¢ Debbie Chawngthu

Mut theih loh hi na si lovah chuan thil tawrh hrehawm tak a ni a. Mut han tum ila, a chhuak lo telh telh a, a tlangpuiin mut theih loh chuan a tha lam aiin a chhe lam ngaihtuah a awl lehnghal bawk si a. Mut tlem chuan taksain a tuar a, a reiah phei chuan taksa a chau takzet thei a ni. I mu thei lo anih chuan a hnuaia tih dan tur tarlan te hi lo chhin ve teh~~

1. Riltam emaw puar lutukin mu suh. Chaw i ei hnu darkar hnihah chauh mu thin ang che.

2. Sleeping pills hi kan uar viau a, mut theih loh chuan min chhawk nachin pawh a nei e. Mahse hei hi tih than chuan a ngaih theih a, a hlauhawm thei a ni. Mut pangngaia mut hi chuan zing thawh ah pawh kan harh vak a, sleeping pills hmanga han mut hi chuan lu a rit bur bakah taksa chau a awm thei a ni. Chuvangin, sleeping pills hi chu khawih loh hram a tha.

3. Mut theih loh pumpelhna tha deuh mai pakhat chu zantin kan mut a chhuak emaw chhuak lo emaw, mut hun pangngaia mut ziah hi a ni. Tin, ei leh in pawh taksain a mamawh ang tawk chauh ei ila, rilru ti hahdam thiam bawk ila a tha khawp mai.

4. Eng tak hnuaiah mut a har a, thima mut hrehawm i tih bawk si anih chuan zero bulb hmang thin ang che. Tin, boruak lut leh chhuak a tha tur a ni a, boruak uap lutuk hnuaiah chuan mut a harsa thin a ni.

5. Darkar riat mu thin i nih chuan chumi hun chu zantin mut tum ang che. Mut hun darkar thlak danglam hian mut dan a buai thei a ni.

6. I mut theih loh lungkham reng chungin mut tum suh. I mut theih loh vanga i inngaihtuah buai khan i taksain a tuar thei a ni tih hre reng ang che.

7. Taksa fai tak put hi chu a nuam a, i mu thei lo anih chuan i zan mut dawnin inbual fai thin ang che.

Zan hnih khat han mut theih loh te hi chu a ziaawm a, mahse hun rei tak chhung i mu tawh lo anih chuan hetiang hian ti ang che~~

1. I mut a chhuah chauhin khumah mu ang che.

2. I khum chu mut nan chauh hmang la, lehkhabu chhiar nan te, TV en pah nan te hmang lo hram ang che.

3. I muhil thei lo anih chuan room dangah kal la, i mut a chhuah hunah chauh i khum pan ang che.

4. Zan lamah i mu tha lo anih pawhin chhun lama mut ching lo la, chhuna i mut khan i zan mut a ti khaihlak thei a ni.

A chunga tarlan zawng zawng te hi zan khata thawk mai chi a ni lova, mihring a zir pawhin a thawh dan a inang lo thei a ni. Kan mutthilh atanga darkar khat velah hian kan blood pressure te, temperature leh kan thawk te thleng hian a tlahniam a, mahse kan thluak erawh a level san lai ber a ni thung. Muttui tak tak lai hi chu zan tir lam hi a ni duh a, hemi hun hi a pawimawh em em a ni. Ram changkang zawka an zir chian dan chuan mut hun duh rei lo te hi thil tihah an zei a, chakna pawh ngah zawkin an ziak tlat a ni. Mut theih loh hi chhan tam tak a awm thei a, rilru hah vang te, hritlang awm na vang te, pum nuam loh vang te, riltam vang te, hah lutuk vang te, bengchheng vang emaw drugs leh ruihhlo dang vang te pawh a ni thei. Coffee hi taksa ti harhtu tha tak a ni a, mahse mut i harsat chuan in lo hram ang che. Zu hi mu tha thei lo tan chuan tha angin lang mahse khuareiah nghawng tha lo a nei thei a, tem loh tawp a tha zawk. I mu thei ngang lo anih pawhin zingah thawh hun pangngaiah han tho la, i nun dan pangngaia nungin a tuk zanah chuan i rin aiin i mu thei tawh ang.

Related Posts :



No comments:

Post a Comment